OQO-daǵy aktsııa: 114 otbasynyń aýlasyna jemis aǵashtary otyrǵyzyldy
ShYMKENT. QazAqparat - Ońtústik Qazaqstan oblysyndaǵy Syrdarııa-Túrkistan memlekettik óńirlik tabıǵı parki «Meıirimdi tabıǵat» atty aǵash otyrǵyzý aktsııasyn ótkizdi, dep habarlaıdy QazAqparat tilshisi.
Aktsııa QR Tuńǵysh Prezıdenti kúnine oraı uıymdastyryldy. Shara barysynda muqtaj otbasylar men egde jastaǵy qarttardyń, sondaı-aq múgedektigi saldarynan ózine-ózi kútim jasaı almaıtyn azamattardyń úılerine jemis aǵashtarynyń kóshetteri otyrǵyzyldy.
Kóshet otyrǵyzý Arys, Báıdibek, Túlkibas aýdandary men Kentaý, Túrkistan qalalarynda ótti.
Sharaǵa ulttyq tabıǵı park qyzmetkerleri, aýdandyq, qalalyq jumyspen qamtý jáne áleýmettik baǵdarlamalar bólimderiniń mamandary, aýyldyq okrýg ákimdikteriniń ókilderi jáne jergilikti mektep ormanshylyqtarynyń músheleri belsene atsalysty.
Jalpy az qamtylǵan 114 otbasynyń aýlalaryna 10 danadan kóshet otyrǵyzyldy. Osylaısha bas-aıaǵy 1140 dana alma, órik, almurt sııaqty jemis aǵashtary turǵyndarǵa úlestirildi.
Ulttyq park qyzmetkerleriniń sózinshe, shara endi dástúrli túrde uıymdastyrylyp turatyn bolady.
