OQO-daǵy 7 jasar balany zorlaý oqıǵasyna endi qoǵam belsendileri aralasty
ShYMKENT. QazAqparat - Ońtústik Qazaqstan oblysyndaǵy 7 jasar balany zorlaý oqıǵasyna endi qoǵam belsendileri aralasatyn boldy. Olar balany jetekshi mamandarǵa teksertip, táýelsiz saraptama jasatpaq. Bul týraly «DOM» qaıyrymdylyq qorynyń basshysy Arýjan Saıyn óziniń jelidegi paraqshasynda jazdy, dep habarlaıdy QazAqparat tilshisi.
«OQO-da Abaı aýylynda zorlandy degen 7 jasar oqýshyǵa qatysty jaǵdaı qalyń kópshilikti alańdatyp otyr. Sondyqtan quqyq qorǵaýshylar men qoǵam qaıratkerleri birigip, osy oqıaǵaǵa qatysty birshama sharalardy qolǵa aldy. Aıtalyq qoǵam belsendisi Janna Ahmetova qaıyrymdy jandardyń qoldaýymen oqýshy men ájesiniń jol shyǵyny, jatar orny men tamaǵyna jaýap beredi.
Gúlzat Asanova Qazaqstannyń psıhologtar keńesi ujymymen birlesip, balany tekseredi. «DOM» qoǵamdyq qory balaǵa kórsetilýi tıis medıtsınalyq qyzmet pen memlekettik organdarmen qatynasta bolý mindetin moınyna alady.
«Bul týralyy QR Bilim jáne ǵylym mınıstrliginiń Balalar quqyǵyn qorǵaý komıtetiniń tóraǵasy Nurbek Orshybekovke eskertip, qoldaý suradyq. Jergilikti óńirdegi mamandarǵa senimsizdik týǵandyqtan osyndaı sheshim qabyldap, kásibı mamandardyń kómegine júginbekpiz. Tekserý nátıjesin jábirlenýshiniń otabsy men memlekettik organdarǵa beremiz jáne soǵan saı sheshim qabyldanady. Quqyq qorǵaýshylar men zańgerlerdi, qoǵam qaıratkerlerin, tanymal jandardy bizdi qoldaýǵa shaqyramyz. Kásibı keńes bere alatyn sarapshylar Tatıana Semenovamen +7 701 783 5303 telefon nómiri arqyly habarlasa alady. Jábirlenýshiniń otbasyn Almatyǵa shaqyrǵanda kómektesem deıtin jandar bolsa, tegin keńes bere alatyn zańgerler bolsa, Janna Ahmetovamen habarlasa alady», delingen paraqshada.
Aıta keteıik, buǵan deıin Ońtústik Qazaqstan oblysy, Saryaǵash aýdanyna qarasty Abaı aýylyndaǵy mekteptiń 1 synyp oqýshysyn ózinen 7-8 jas úlken 4 bala 5 aı boıy zorlap kelgen dep aıyp taǵylǵan bolatyn. Jábir kórdim degen bala bul týraly týystaryna byltyr tamyz aıynda aıtqan eken. Sodan beri jetkinshektiń ájesi polıtseılerge birneshe ret aryzdanǵanymen, tártip saqshylary shaǵymdy tek qańtar aıynda qabyldaǵan. Sóıtip polıtseıler tek eki kún buryn ǵana osy oqıǵaǵa qatysty Qylmystyq kodekstiń 121 babynyń 4 bóligimen is qozǵalyp, tergelip jatqanyn málimdedi.
Sondaı-aq tártip saqshylary qaıta saraptamalar taǵaıyndalyp, ózge málimetter tergeý qupııasyna baılanysty jarııalanýǵa jatpaıtyndyǵynan habar berdi. Daýly máselege oraı kúni keshe elimizdiń Bilim jáne ǵylym mınıstrligi de jaýap qatqan edi. Olar 7 jasar bala oqıtyn mektepte komıssııa qurylyp, ustazdar tarapynan da jan-jaqty tekserý jumystaryn bastap ketkenin jetkizgen. Biraq, balanyń zorlanǵanyn joqqa shyǵarǵan bolatyn.
«Saraptama jasaldy, onyń qorytyndysy boıynsha, balanyń zorlanbaǵany anyqtaldy. Muny oblystyq bilim basqarmasy da rastady»,- dedi Bilim jáne ǵylym mınıstriniń orynbasary Bıbigúl Asylova.
Qazir atalǵan qylmystyq is oblystyq ishki ister departamenti bastyǵynyń jeke baqylaýyna alynǵan. Quzyrly organdar tıisti tekserý sharalaryn júrgizýde.
