OQO-daǵy 7 jasar bala isine halyqaralyq sarapshylar shaqyrylýy múmkin
ASTANA. QazAqparat - «Ana úıi» qory atqarý komıtetiniń tóraǵasy Anar Rahymbaeva OQO-daǵy 7 jasar bala isi boıynsha sheteldik sarapshylar shaqyrylýy múmkin ekendigin málimdedi, dep habarlaıdy QazAqparat tilshisi.
«Men balanyń anasynyń resmı ókilimin. Bas prokýratýranyń ókilimen tyǵyz jumys istep jatyrmyz. Balanyń anasy dúısenbi kúni Almatyǵa barady. Ol bizdiń Almatydaǵy daǵdarys ortalyqtarymyzdyń birine ornalasady. Barlyq sharalar prokýratýranyń qadaǵalaýymen júrgiziledi. Osy iske halyqaralyq sarapshylardy jumyldyrý arqyly saraptama ótkizý máselesi sheshilip jatyr», - dedi ol.
Anar Rahymbaeva jýrnalıstermen kezdesýde balanyń anasynyń jaǵdaıy týraly aıtty.
«Oǵan qazir mamandar qamqorlyq kórsetip otyr. Ol otyrǵan Ana úıinde taǵdyrdan japa shekken taǵy da 14 ana bar. Men úsh kúnnen beri onymen birgemin. Olar Ózbekstannan kelgen etnıkalyq qazaqtar», - dedi A. Rahymbaeva.
Onyń sózine qaraǵanda, 14 jasynan eńbekke jegilgen ana otbasyn jalǵyz ózi asyrap otyr.
«Tipti balany ómirge ákelgen soń qıyn da bolsa balasyn ózi aıaqqa turǵyzýǵa sheshim qabyldaǵan. Taǵdyrdyń júgin arqalaǵan áıel balasyn ájesine qaldyryp, Almatyǵa jumys izdep ketken. Mundaı jaǵdaı, Qazaqstandaǵy kóptegen otbasynda bar. Áıel qazir qaıǵyǵa býlyǵyp otyr. Memleket ony barynsha qorǵaıdy», - deıdi Anar Rahymbaeva.
Aıta keteıik, áleýmettik jelide «Abaı aýylyndaǵy mektepterdiń birinde 7 jasar balany joǵary synyp oqýshylary birneshe ret zorlap kelgen» degen aqparat taraǵan soń, derek boıynsha Qylmystyq kodeksiniń 121-babynyń 4-bóligimen Saryaǵash aýdandyq ІІB PB qylmystyq is qozǵaǵan bolatyn.
Keıin elimizdiń bala quqyqtary jónindegi ýákili Zaǵıpa Balıeva Shymkentke arnaıy baryp, keleńsiz oqıǵaǵa dýshar bolǵan jetkinshekti ózimen birge elordaǵa alyp kelgen.
15 naýryzda OQO ákimi Janseıit Túımebaev shuǵyl jınalys ótkizip, birqatar laýazymdy tulǵalarǵa qatysty shara qoldanylǵanyn aıtty.
