OQO-daǵy 57 eldi meken bıyl kógildir otynmen qamtylady
ShYMKENT. QazAqparat - Ońtústik Qazaqstan oblysynda bıylǵy jyly 57 eldi meken kógildir otynmen qamtylady. Osy maqsatqa oblystyq bıýdjetten 14,1 mlrd teńge jumsalmaq. Bul týraly aımaq basshysy Janseıit Túımebaev málim etti, dep habarlaıdy QazAqparat HAA tilshisi.
Aıta keteıik, búginde oblysta 844 eldi mekenniń 300-i tabıǵı gazben qamtamasyz etilgen. ıAǵnı bul óńirdiń 1 755 307 turǵyny kógildir otynǵa qol jetkizip otyr degen sóz.
«Oblystyń eldi mekenderin 2017-2020 jyldar aralyǵynda gazdandyrýdyń keshendi is-shara jospary ázirlendi. Josparǵa sáıkes 2020 jylǵa qosymsha 383 eldi mekendi gazdandyrý josparlanyp otyr. 2021 jylǵa qaraı tabıǵı gazben qamtylǵan eldi mekender sanyn 683-ke nemese 2 mln. 720 myń turǵynǵa jetkizý mejelenip otyr»,- dedi Janseıit Qanseıituly.
Óńir basshysynyń aıtýynsha, ólkemizdegi eldi mekender 73 paıyz aýyz sýmen qamtylǵan. Bul kórsetkish boıynsha óńir respýblıkada 4-shi orynda. Arnaıy qabyldanǵan baǵdarlamaǵa saı aldaǵy jyldary 844 eldi mekenniń 701-i, ıaǵnı 83 paıyzy taza sýǵa qol jetkizedi.
