OQO-daǵy 43 sý qoımasynyń 9-y barynsha tolǵan
ShYMKENT. QazAqparat - Ońtústik Qazaqstan oblysynda 43 sý qoımasynyń 9-y barynsha tolyp, tranzıttik rejımge kóshirilgen. Bul óz kezeginde sý qoımalarynyń nóserlep jaýǵan jaýyn-shashyn men taýdaǵy qardyń erindi sýlaryn qaýipsiz qabyldap ótkizý múmkindigin tómendetken. Oblys ákimdiginde ótken kóktemgi tasqynnyń aldyn alý sharalaryn talqylaýǵa arnalǵan jıynda óńirdiń Tótenshe jaǵdaılar departamentiniń bastyǵy Nurbolat Derbisov osyndaı málimdeme jasady, dep habarlaıdy QazAqparat HAA tilshisi.
Oblys kóleminde sý tasqyndarynyń aldyn alý maqsatynda atqarylyp jatqan jumystarǵa oraı uıymdastyrylǵan jıynda Nurbolat Bekbolatuly óńirde qalyptasyp otyrǵan jaǵdaılar jóninde baıandady. Onyń aıtýynsha, óńirdegi sý qoımalarynda qaýipsiz rejımdi saqtaý barynsha kúsheıtilgen.
«Máselen, Jambyl oblysynda jaýǵan qatty jaýyn-shashyn men taýdaǵy qardyń erýi saldarynan 30 naýryzda Jýaly aýdanynan bastalatyn Boraldaı ózeniniń sýy 375 sm-ge kóterilip, Boraldaı eldi mekeniniń tusynda aǵysy sekýndyna 250 tekshe metrdi quraǵan. Jergilikti ákimdik pen polıtsııa, órt sóndirý bólimderiniń qyzmetkerleri turǵyndarmen birigip, qorǵanys dambalarynyń osal jerlerin kóterip, nyǵaıtyp, táýlik boıy qaýipti jerlerge kezekshilik uıymdastyrý sııaqty atqarylǵan jumystardyń arqasynda biz úlken tasqyn sýdy ótkizip, Túlkibas aýdanyndaǵy birneshe eldi mekenderdi sý basýdan qorǵadyq»,-dedi Derbisov.
Boraldaı ózeniniń tasqyn sýy 31 naýryz kúni Arys ózenine qosylyp, sýdyń aǵysy sekýndyna 243 tekshe metr jyldamdyqpen ótken. Sonyń saldarynan Ordabasy aýdany aýmaǵyndaǵy «Batys Eýropa-Batys Qytaı» tasjolynyń 2226 shaqyrymdaǵy Arys ózeniniń arnasynyń ústinen ótetin kópirdiń tirekteriniń jan-jaǵyn sý shaıyp, opyrylyp qulaýyna ákep soqtyrǵan. Qalyptasqan jaǵdaıdan bolýy múmkin tótenshe jaǵdaılardyń aldyn alý maqsatynda Oblystyq TJB qyzmetkerlerimen jolǵa ýaqytsha shekteý qoıylyp, qatynas Ordabasy aýdanynyń Temirlan eldi mekenindegi jol arqyly júrgizilgen. Osyǵan baılanysty ózen arnalarynda qajetti sharalardy atqarý, barlyq ózen sýlary men sý qoımalary qatań baqylaýǵa alynyp, monıtorıng jasaý jumystary júrgizilýde.
Tótenshe jaǵdaılardyń aldyn alý jáne zardaptaryn joıý jónindegi májiliste oblys ákiminiń orynbasary Ulasbek Sádibekov óńirde saqtyq sharalardy tyńǵylyqty oryndaýdy júktedi.
«Óńirdegi kóktemgi sý tasqynynyń erekshelikterin eskere otyryp, oǵan jan-jaqty daıyndalmasa bolmaıdy. Qala jáne aýdanǵa qarasty aýmaqtarda sý basý qaýipti jerlerde únemi vızýaldy zertteý jumystaryn júrgizý kerek. Sý arnalary men aryqtardy qoqystardan tazalap sý ótkizý qabiletin joǵarylatý jáne sý qoımalarynda qaýipsiz rejımdi saqtaýdy basty negizge alý shart»,- dedi oblys ákiminiń orynbasary Ulasbek Sádibekov.
Jıyndy qorytyndylaǵan oblys ákiminiń orynbasary tıisti mekeme basshylaryna, sondaı-aq aýdan ákimderine kóktemgi sý tasqynyna baılanysty jaǵdaıdy kúnbe-kún baqylap, monıtorıng jasap, barlyq qajetti sharalardy qolǵa alýdy tapsyrdy.
