OQO-daǵy 22 jobany «Qazaqstan damý banki» AQ qarjylandyrmaq
ASTANA. QazAqparat - Búgin Ońtústik Qazaqstan oblysynyń ákimi Asqar Myrzahmetov óńirge arnaıy jumys saparymen kelgen «Qazaqstannyń damý banki» AQ basqarma tóraǵasy Bolat Jámishevpen kezdesti.
Kezdesýde ekonomıka ósimin arttyrýda qosymsha rezervti anyqtaý máseleleri talqylanyp, qarjylandyrylýy tıis jańa ınvestıtsııalyq jobalar saralandy. Qos taraptar ózara yntymaqtastyq jónindegi memorandýmǵa qol qoıyp, jalpy quny 617,5 mlrd. teńgeni quraıtyn 22 jobany qarjylandyrý jóninde kelisimge keldi, dep habarlaıdy OQO ákiminiń baspasóz qyzmetinen. «Qazaqstannyń damý banki» AQ basqarma tóraǵasymen ótken jıynda óńirdiń ınvestıtsııalyq múmkindikteri keńinen sóz bolyp, ekonomıkany órge súıreıtin jańa jobalardyń tanystyrylymy ótti. «Qazaqstan damý banki» AQ basqarma tóraǵasynyń nazaryna aldymen Shymkent qalasyndaǵy áýejaıdy jańǵyrtý jobasy usynyldy. Byltyrǵy jyly áýejaı 420 myń jolaýshyǵa qyzmet kórsetse, taıaý ýaqytta mundaǵy jolaýshylar aǵyny 30 paıyzǵa artady dep josparlanýda. Sol sebepti áýejaıdyń termınaly men ushý jáne qoný jolaǵyn zaman talabyna saı qaıta jasaqtaý mindeti tur. Sonymen qatar avtostansa jáne temir jol perronyn salý oılastyrylyp, bul elimizdegi eń tuńǵysh mýltımodeldi hab bolyp qalyptasady. Al saýda-logıstıkalyq ortalyǵynda «A» klasty zamanaýı qoımalar qurylysyn bastaǵan «Continental Logistics» JShS jobanyń ekinshi kezeńinde otandyq kókónister men jemis-jıdekterdi qalypty kúıinde saqtaýǵa arnalǵan klımattyq qoımalar salýdy uıǵaryp otyr. Elimizdegi jáne sheteldik naryqta ózindik oryn ıelengen «Hill corporation» JShS bazalyq maılar shyǵaratyn jańa kásiporynnyń negizin qalaýdy josparlaýda. Aldyn ala jasalǵan taldaý boıynsha munda daıyndalǵan ónimniń 40 paıyzy qytaı eline eksporttalmaq. Sondaı-aq bul kezdesýde «Molochnyı raı» JShS 1000 bas asyl tuqymdy mal asyraıtyn sút-taýarly fermasy men zamanýı sút óndeý zaýyty jobalarynyń tanystyrylymyn júrgizdi. Al «Amır A» JShS metallýrgııalyq zaýyty qos tavrly jáne úlken ólshemdi shveller buıymdaryn óndirýdi kózdep otyr. Jobalarmen muqııat tanysqan «Qazaqstan damý banki» AQ basqarma tóraǵasy B.Jámishev osy jobalardyń árqaısysy da uıymnyń maqsat-múddesine saı keletinine toqtalyp, qarjylaı qoldaý kórsetýge bolatynyn atap ótti. Sondaı-aq basqarma tóraǵasy Kentaý transformator zaýytynyń qýattylyǵy 110-120 kVt transformatorlar shyǵarý jelisin ulǵaıtý, «Ońtústik» ındýstrıaldy aımaǵy» dırektsııasynyń gazdy óńdeý arqyly elektr energııasyn óndirý, «Nazar tekstıl» JShS kilem fabrıkasynyń ekinshi kezeńin júrgizý, Túrkııanyń «Kalancha» kompanııasymen birlese djınsy matasyn shyǵarý, «Shymkentmaı» AQ óndiristik keshenin jańǵyrtý sekildi jobalarmen de tanysyp, olardyń bıznes-josparlary uıym múdessine saı bolsa qarjylandyrýǵa daıyn ekendigin málimdedi. Al Qasqasýda taý-shańǵy kýrortyn júrgizý, granýlalyq propılender men joǵary oktandy benzın óndirisine qajetti metıltretbýtıldy efır óndirý, sary fosfor men fosfor qyshqylyn shyǵarý, jelden elektr energııasyn óndirý, radıatorlar óndirisin qolǵa alý syndy jobalar boıynsha bıznes-táýekelder naqty eseptelip, jobanyń kommertsııalyq qundylyǵy men odan túsetin paıda durys aıqyndalýy kerek. Tús qaıta «Qazaqstannyń damý banki» AQ basqarma tóraǵasy Shymkent munaı óńdeý zaýyty men «Standart tsement» JShS tsement zaýytyn qaıta jańǵyrtý jumystarymen jáne Shymkent qalasynda salynyp jatqan saýda-logıstıkalyq ortalyǵynda «Continental Logistics» JShS-niń qoıma keshenderimen tanysty.
