OQO-da zorlady dep jalǵan aıyp taqqan boıjetken sottaldy
Saraǵash aýdany prokýrorynyń orynbasary Faızýlla Turymovtyń sózinshe, Abaı aýylynyń turǵyny ápkesiniń aıtýymen qurylys jumystaryn júrgizip jatqan Ózbekstan Respýblıkasynyń eki azamatymen birge ishimdik ishedi. Boıjetken keıin óziniń ústindegi kóılegin jyrtyp tastap, Saryaǵash aýdandyq ІІB-nyń polıtsııa qyzmetkerlerin shaqyrtqan.
Oqıǵa ornynan kelgen tártip saqshylaryna ol «qurylysshylardyń ekeýi de uryp-soǵyp, pyshaqpen qorqytyp, meni erkimnen tys zorlady» dep aryzdanǵan. Aýdannyń polıtseıleri osy oqıǵaǵa qatysty Qylmystyq kodekstiń 120-baby 2- bóligi «Zorlaý» boıynsha is qozǵap, tergep-tekserý amaldaryn júrgizedi. Degenmen, mastyǵy tarqaǵan soń boıjetken polıtsııa qyzmetkerlerine ózi jalǵan aryz jazǵany jáne jalǵan jaýap bergenin aıtyp berip, jasaǵan áreketterine ókinish bildirgen.
Sóıtip kórineý jalǵan sóz jetkizgen azamatshanyń ústinen Qylmystyq kodekstiń 419-baby 3-bóligi «Kórineý jalǵan sóz jetkizý» jáne 420-baptyń 2 bóligimen «Sarapshynyń, mamannyń kórineý jalǵan aıǵaqtary, qorytyndylary nemese qate aýdarma» boıynsha qylmystyq is qozǵalyp, tolyǵymen dálelin tapty. Saryaǵash aýdandyq sotynyń úkimimen boıjetken 5 jylǵa bas bostandyǵynan aıyryldy.