OQO-da zııankesterge qarsy kúres sharalary 275 myń gektarǵa júrgiziledi
ShYMKENT. QazAqparat - Ońtústik Qazaqstan oblysynda bıyl úıirli shegirtke tektes zııankesterge qarsy kúres sharalary 275 myń gektarǵa júrgiziledi. Bul týraly Saryaǵash aýdanynda shegirtkege qarsy dárileý jumystaryn uıymdastyrý, úılestirý boıynsha ótken semınarda oblys ákimi Janseıit Túımebaev málim etti, dep habarlaıdy QazAqparat HAA tilshisi.
Úıirli shegirtkege qarsy kúres sharalaryn júrgizetin tehnıkalardyń daıyndyǵymen tanysqan aımaq basshysy zııankesterge bıologııalyq kúresti joǵary deńgeıde uıymdastyryp, zertteý-anyqtaý sharalaryn tyńǵylyqty ári sapaly júrgizýdi tapsyrdy.
«Der kezinde aldyn alý sharalaryn qolǵa alý qajet. Bul zııankesterdiń álsiz ári shaǵyn kezin tıimdi paıdalanyp hımııalyq dáriler arqyly joıýǵa jumyla áreket etpesek kúnine 50-60 shaqyrym joldy jaıpap ótetin shegirtkege eshkim qarsy kele almaı qalady. Sondyqtan zıankesterge qarsy hımııalyq kúres sharalaryna asa jaýapkershilikpen qaraý kerek», - dedi Janseıit Qanseıituly.
Aǵymdaǵy jyly dárileý sharalary ótken jylmen salystyrǵanda 2,4 esege artyq bolyp otyr. Hımııalyq óńdeý jumystaryn júrgizý úshin 1574,7 myń gektar alqapta anyqtaý-zertteý jumystary qolǵa alyndy. Oǵan «Respýblıkalyq fıtosanıtarlyq dıagnostıka jáne boljamdaý ádistemelik ortalyǵy» memlekettik mekemesiniń oblystyq fılıaly tarapynan 93 adam jumyldyrylǵan.
Hımııalyq óńdeýden ótetin aýmaqtarǵa jerústi agregattary, ushaqtar jáne aspaly búrikkishter qoldanylady. Dári sebiletin jerlerdiń basym kópshiligi Saryaǵash aýdanyna tıesili. Sonymen qatar Arys, Shardara, Ordabasy jáne Báıdibek aýdandaryna da qarjy men qajetti kólemde dári bólingen. Josparǵa sáıkes dárileý jumystary zııankesterdiń marokko, azııalyq shegirtke, ıtalıandyq prýs túrlerine júrgiziledi.
«Anyqtaý-zertteý jumysyn sapaly júrgizý úshin aýdandyq, qalalyq jumyspen qamtý ortalyqtarynan qosymsha 287 anyqtaýshy bólinetin boldy. Marokko shegirtkesine qarsy hımııalyq óńdeý jumystaryna 71 dana jerústi agregaty, 5 dana AN-2 ushaǵy qaralyp, arnaıy mamandar tıisti jumystaryna kiristi»,-dedi oblystyq aýmaqtyq ınspektsııa basshysy Núrken Badyraqov.
Sondaı-aq alǵash ret oblystyq aýmaqtyq ınspektsııada jedel baılanys ortalyǵy ashylyp otyr. Ortalyqtyń «1305» nómirine kez-kelgen azamat habarlasyp, shaǵymdaryn aıtýyna bolady. Bul sharalar agroqurylymdardyń usynystaryn, shaǵymdaryn der kezinde qarap, naqty sharalar qabyldaý úshin jáne byltyrǵy jylǵy kemshilikterdi bolǵyzbaý maqsatynda qolǵa alynǵan.
