OQO-da jylyjaılar kólemi 200 gektarǵa artatyn boldy
ASTANA. QazAqparat - Ońtústik Qazaqstan oblysynda ótken jyly jylyjaı kólemi 202 gektarǵa jetip, mejelengen jospardan 9 paıyzǵa artqan. Al jalpy oblysta jylyjaı kólemi - 1325 gektarǵa jetti. Osylaısha Ońtústik Qazaqstan oblysynyń respýblıkadaǵy úlesi 80 paıyzdy qurady.
Memleket basshysynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri atty» Joldaýynda agrarlyq saıasat eńbek ónimdiligin túbegeıli arttyrýǵa jáne óńdelgen ónimniń eksportyn ulǵaıtýǵa baǵyttalýy kerektigin atap ótken bolatyn. Osyǵan oraı oblys ákimi Janseıit Túımebaev sala jetekshilerine 2018 jyly jylyjaılar kólemin 200 gektarǵa arttyrý kerektigin tapsyrdy, dep habarlaıdy Ońtústik qazaqstan oblysy ákimdiginiń baspasóz qyzmeti.
Oblystaǵy jylyjaı kóleminiń basym bóligi Saryaǵash aýdanynda - 72,21 gektar, Qazyǵurt aýdanynda 29 gektar, Túrkistanda - 18,27 gektar, Ordabasy aýdanynda - 16,05 gektar aýmaqty alyp jatyr.
Aıta keterligi, oblysta kókónis ósirýmen aınalysatyn, elimizdegi eń iri «Adelıa» jylyjaı kesheni jumys isteýde. «Agrobıznes 2020» baǵdarlamasy boıynsha iske qosylǵan bul jobanyń ınvestıtsııalyq quny - 5,3 mlrd teńge. Jalpy aýmaǵy 16 gektar bolatyn «Adelıa» jylyjaı kesheninde jylyna 8,4 myń tonna ónim jınalady. Onyń 70 paıyzy elimizdiń naryǵyna shyǵarylsa, qalǵan 30 paıyzy Reseıge eksporttalady.
Budan bólek, Qazyǵurt aýdanynda jylyjaı kesheninde «Gýl Mansýr» JShS sharýa qojalyǵy qyzǵaldaq egýmen aınalysyp keledi. Jalpy jer kólemi - 2,5 gektar. Máselen, ótken jyly 45 myń dana gúl ónimin aldy. Jobanyń jalpy quny - 12 mln tenge.
Oblystyq statıstıka departamentiniń málimeti boıynsha, 2017 jyly jylyjaı alqabynan 114,3 myń tonna kókónis ónimderi jınalǵan. Onyń ishinde, 62,6 myń tonnasy qyzanaq, 51,7 myń tonnasy qııar.
