OQO-da jylytý maýsymy bastalǵaly beri 33 adam ýlanyp qalǵan
ShYMKENT. QazAqparat - Ońtústik Qazaqstan oblysynda jylytý maýsymy bastalǵaly beri 33 adam ýlanyp, 14 adam qaza tapty, dep habarlaıdy QazAqparat tilshisi.
Sala mamandarynyń sózinshe, ýlanyp qalý jaǵdaılarynyń basym kópshiliginde turǵyndar úıdegi jylytý quralyn zańsyz qosyp, talapqa saı tekserýden ótkizbegen. Máselen, Shymkent qalasynyń irgesindegi «Qarabastaý» aýylynda úı ıeleri baspanalaryn tabıǵı gazdy shlangi arqyly kirgizip, jylytyp otyr. Al, keıbir úılerde jurt jýan qubyr ishinen baıqatpaı, jylý jelisin ornatyp alypty. Qaýipsizdik talabyna saı kelmeıtin mundaı aıla-amaldar jańa salynǵan úılerde kóp kezdesedi eken. Óńirde kógildir otyndy tutynatyn 300 myńnan asa abonent bolsa, sonyń 2 myńǵa jýyǵy gazdy zańsyz paıdalanyp otyr eken.
«Bizdiń oblysta 100 shaqty merdiger gaz tartýmen aınalysady. Ondaǵy mamandardyń tájirıbesizdiginen nemese keıbir aılaker is-áreketke baryp, halyqtan aqsha jıyp, gaz qosyp beretin jaǵdaılar bar», - deıdi «QazaqTransGaz» AQ óndiristik aımaǵynyń tehnıkalyq bólim basshysy Jeńis Qýanyshbekov.
Mamandar, sondaı-aq, keıbir páterlerde sý qubyry durys ornatylmaı, syrtqa shyǵarylýy tıis ýly tútin úı ishine tarap ketetinin aıtady.
«Kóbine jer úılerde kóp bolady. Óıtkeni, olarda avtonomdy jylytý júıeleri júrgizilgen. Kómirmen jylytady. Qubyr tazalanbaıdy. Monshaǵa túskende qatty otyndy mólsherden kóp paıdalanyp, ýlaný faktileri bolady», - deıdi Shymkent qalalyq Tótenshe jaǵdaılar qyzmeti basqarmasynyń ınjeneri Nurjan Pernazarov.
Sondyqtan gaz salasynyń mamandary men tótenshe jaǵdaı qyzmeti birlesip, turǵyn úılerge reıdtik sharalar ótkizip jatyr.
