OQO-da jyldyń sońynda asfalt pen bıtým óndiretin zaýyt iske qosylady
ShYMKENT. QazAqparat - Ońtústik Qazaqstan oblysynda osy jyldyń sońynda «DezFýmeks» JShS-niń asfalt jáne bıtým shyǵaratyn zaýyty iske qosylady, dep habarlaıdy oblys ákiminiń baspasóz qyzmeti.
«Ońtústik» ındýstrıaldy aımaǵynda ornalasqan bul jobanyń quny 120 mln teńgeni quraıdy. Zaýyt óndiristik jospary boıynsha jylyna 10 tonna bıtým, iri túıirli asfalttan 8 myń tonna, maıda túıirli asfalttan 22 myń tonna, jalpy alǵanda jylyna 40 myń tonna asfalt jáne bıtým shyǵarýdy kózdep otyr.
Jańa jobanyń júzege asýy otandyq óndiristiń damýyna, jańa jumys oryndarynyń ashylýyna jáne daǵdarys kezinde elimizdiń ekonomıkalyq turaqtylyqta bolýyna septigin tıgizedi. Kásiporyn jumysyn bastaǵan kezde munda 20-dan astam azamat jumyspen qamtylatyn bolady.
Óndiristiń ıesi, jergilikti kásipker Jalshybek Shúmenov oblystaǵy kásipkerlerge qyzmet kórsetý ortalyǵynyń kómegimen bıznes-josparyn ázirlep, qoldanýǵa daıyn asfalt shyǵarýǵa baǵyttalǵan zaýytty salyp otyr.
Shaǵyn jáne orta bıznes joǵary qarqynmen damyp keletin ońtústikte ındýstrııalandyrý kartasynyń ekinshi besjyldyǵy (2015-2019 jj.) aıasynda jalpy somasy 47,1 mlrd teńgeni quraıtyn 47 joba iske asyrylyp, 1 650 jańa jumys orny ashyldy. Al, osy jyly quny 1,7 mlrd teńge bolatyn 3 joba iske qosylsa, jyl sońyna deıin 14 jobany júzege asyrý josparlanyp otyr.
