OQO-da jyl sońyna deıin 20 medpýnkt paıdalanýǵa beriledi
ShYMKENT. QazAqparat - Ońtústik Qazaqstan oblysynda jyl sońyna deıin 20 medpýnkt paıdalanýǵa beriledi. Bul týraly óńirlik kommýnıkatsııalar qyzmetinde ótken baspasóz máslıhatynda Densaýlyq saqtaý basqarmasynyń basshysy Muqan Egizbaev jarııa etti.
Jyl basynan beri atqarylǵan jumystardy baıandaǵan spıkerdiń aıtýynsha, óńirde budan ózge 4 iri emhananyń qurylys júrgizilip jatyr.
«Bıyl jergilikti bıýdjet qarajaty esebinen 3,7 mlrd. teńgege 34 nysan salynyp, 1,92 mlrd. teńgege 10 nysanda kúrdeli jóndeý jumystary júrip jatyr. Oblys tarıhynda birinshi ret bir kezende Saıram, Maqtaaral aýdandary men Kentaý qalasynda 4 iri emhananyń qurylysy qatar júrgizilýde», - dedi oblystyń bas dárigeri.
Memlekettik-jekeshelik áriptestik sheńberinde densaýlyq saqtaý ınfraqurylymyn odan ári damytýdy qamtamasyz etý úshin Shymkent qalasynda «Qaıtpas» shaǵynaýdanynda bir aýysymda 500 adam qabyldaıtyn emhana salynýda. Budan basqa oblys ortalyǵynda taǵy qalalyq 3 emhana salynady. Al OQO ákimdigi jańa onkologııalyq dıspanserin salýǵa jer telimin bóldi. Týberkýlezge qarsy dıspanserin qala shetine shyǵarý máselesi sheshildi. Saryaǵash jáne Shymkent qalalarynda perınataldy ortalyqtar salýǵa jer telimderi bólindi.
«Óńirde modýldik quramaly medıtsınalyq pýnkt satyp alý jobasy iske qosyldy. Munyń ereksheligi bir pýnkttiń quny jergilikti bıýdjet úshin qurylys salýǵa qaraǵanda eki ese arzanǵa túsedi. Buryn mundaı qurylys júrgizýge 2 jyldaı ýaqyt ketetin. Al modýldik medpýnkti tolyq iske qosýǵa nebári 2-aq aı ýaqyt ketedi. Oblys ákimdiginiń qoldaýymen bıyl osyndaı 20 pýnkt ornatylady. 2018 jyly 67-si paıdalanýǵa beriledi. Osylaısha oblystyń medıtsınalyq pýnktterge degen qajettiligin qysqa merzimde 100% óteıtin bolamyz», -dedi M.Egizbaev.
Jedel medıtsınalyq kómek qyzmetin halyqaralyq standarttarǵa sáıkestendirý jáne jańǵyrtý maqsatynda Shymkent qalalyq jedel medıtsınalyq járdem kórsetý stantsııasy senimgerlik basqarýǵa sheteldik kompanııaǵa berildi. Oǵan qosymsha 6 beket ashyldy. 
