OQO-da jyl sońyna deıin 20-dan astam ІT synyptary ashylady
ShYMKENT. QazAqparat - Ońtústik Qazaqstan oblysynda jyl sońyna deıin 20-dan astam ІT synyp ashylady. Jeke kásipkerler tarapynan salynatyn ortalyqtarda jergilikti jumyssyz azamattar tegin oqytylady. «Nur Otan» partııasynyń oblystyq fılıaly bastamasymen qolǵa alynǵan joba aıasynda kásipkerlermen arnaıy memorandým jasady, dep habarlaıdy QazAqparat tilshisi.
Joba boıynsha atalǵan synyptar aǵymdaǵy jyldyń qazan-qarasha aılarynda oqytýdy bastaıdy dep kútilýde. Onda bolashaq ІT mamandary «Tsıfrlyq Qazaqstan» jobasynyń negizinde biliktilikterin arttyratyn bolady. Al, keler jyldan bastap qosymsha 900 maman bilimin jetildirmekshi. Osylaısha aımaqta jumyssyzdyq deńgeıi tómendep, zaman talabyna saı mamandar sanyn artý kózdelip otyr.
Aıta keteıik, jýyrda ǵana M.Áýezov atyndaǵy OQMÝ-niń bazasynan ІT synyp ashyldy. Onda negizinen oqý ornynyń shákirtteri bilimin jetildiredi. Al, jańadan ashylatyn ortalyqtarda jalpy óńirdiń 4500-ge tarta azamaty oqytylady dep josparlanyp otyr.
