OQO-da jyl sońyna deıin 100 myńǵa jýyq turǵyn tabıǵı gazǵa qol jetkizedi
ASTANA. QazAqparat - Bıyl Ońtústik Qazaqstanda jyl sońyna deıin 100 myńǵa jýyq jergilikti turǵyn tabıǵı gazǵa qol jetkizetin bolady. Ol úshin oblystyq bıýdjetten 14,1 mlrd. teńge qarjy qarastyrylyp otyr, dep habarlaıdy QazAqparat.
Al 2017 jyldyń qorytyndysymen óńirdegi 57 eldi meken nemese 99,5 myń adam tabıǵı gazben qamtylyp, oblystaǵy gazdandyrylǵan aýyl, aımaqtar sany 357-ge (42,3 %), ıaǵnı, 1 854 807 turǵynǵa (65,3 %) jetetin bolady.
Munan bólek, osy jyly «Gazlı-Shymkent» magıstraldy gaz qubyry boıynan Qazyǵurt aýdanyna «Shanaq» avtomattandyrylǵan gaz taratý stantsııasy (ári qaraı AGTS) jáne Shardara aýdanyna №18 «Shardara» AGTS qurylystary júrgizilýde. Nysandardy 2018 jyldyń aıaǵynda paıdalanýǵa berý josparlanǵan. Bul óz kezeginde atalǵan aýdandardy tolyǵymen gazdandyrýǵa jol ashady.
Aıta keteıik, oblys tabıǵı gazben Ózbekstan Respýblıkasynan keletin «Gazlı-Shymkent» jáne otandyq «Beıneý-Bozaı-Shymkent» magıstraldy gaz qubyrlarynan qamtamasyz etiledi. Tabıǵı gazǵa jyldyq qajettilik ortasha 1 mlrd. tekshe metrdi quraıdy.
Sońǵy 8 jylda tabıǵı gazben qamtylmaǵan 203 eldi meken qosymsha gazdandyrylyp, jalpy oblystaǵy 844 eldi mekenniń 300-i (35,5 % ) nemese 1 755 307 turǵyny (61,8 %) tabıǵı gazben qamtamasyz etilgen.
Oblystyq energetıka jáne turǵyn úı-kommýnaldyq sharýashylyq basqarmasymen oblystyń eldi mekenderin 2017-2020 jyldar aralyǵynda gazdandyrýdyń keshendi is-shara jospary ázirlendi.
