OQO-da jyl sońyna deıin 1,5 mlrd. teńgeden astam qarjy ıgerilmeı qalýy múmkin
ShYMKENT. QazAqparat - Ońtústik Qazaqstan oblysynda jyl sońyna deıin 1,5 mlrd teńgeden astam qarjy ıgerilmeı qalýy múmkin. Bul týraly búgin oblys ákimdiginde ótken selektorlyq májiliste sóz boldy. Alqaly jıynda, sondaı-aq, óńirdiń áleýmettik-ekonomıkalyq damý jaıy talqylandy, dep habarlaıdy QazAqparat HAA tilshisi.
Oblys ákimi Janseıit Túımebaevtyń tóraǵalyǵymen ótken májiliste 8 aıda atqarylǵan jumystar pysyqtaldy. Jıynda Oblystyq ekonomıka jáne josparlaý basqarmasy basshysy Arman Sabıtovtyń esebi tyńdaldy. Basqarma basshysynyń aıtýynsha, oblysta árbir sala boıynsha ilgerileýshilik bar. Máselen, aýyl sharýashylyǵy salasynda 527 mlrd teńgeniń ónimi óndirilgen. Dese de bekitilgen jospardyń barysy talqylanyp, jyldyń sońyna deıin ıgerilmeı qalady-aý degen birqatar salalar qamtyldy.
«Qarjyny ıgerý maqsatynda qala, aýdan ákimderimen birge oblystyq energetıka jáne turǵyn úı kommýnaldyq sharýashylyq, qurylys basqarmalarynyń basshylary bilek sybana jumysqa kirisýi tıis», - dedi oblys ákimi Janseıit Túımebaev.
Respýblıkalyq jáne oblystyq bıýdjetten bólingen qarjyny qalǵan úsh aıda tolyq ıgerý mindeti Shymkent qalasy men Ordabasy, Saryaǵash aýdany ákimdikterine júkteldi. Investıtsııa tartý, óndiris, aýyl sharýashylyǵy salasynda jumysty jandandyrý qala, aýdan ákimderine qatań tapsyryldy. Aımaq basshysy tapsyrmany oryndamaǵandar qyzmetimen de qoshtasýy múmkin ekenin eskertti.
