OQO-da jyl basynan beri tórt baǵytqa jańa avtobýs qatynasy ashyldy
ASTANA. QazAqparat - OQO-da jyl basynan beri tórt baǵytqa jańa avtobýs qatynasy ashyldy. Bul týraly búgin OQO Óńirlik kommýnıkatsııalar qyzmetinde ótken baspasóz konferentsııasynda oblystyq jolaýshylar kóligi jáne avtomobıl joldary basqarmasynyń salalyq jetekshileri - basqarma basshysynyń orynbasarlary Maqsat Myrzabaev pen Rolan Ibragımov habarlady.
Aldymen, jyl basynan beri basqarmanyń jol kóligi salasynda atqarylǵan jumystardyń barysyna toqtalǵan M.Myrzabaev oblys turǵyndary men eldi mekenderdi turaqty jolaýshylar tasymalymen qamtamasyz etý jaıyna toqtalyp, búginge deıin 766 eldi mekenniń 691-i ıaǵnı, 90,2%-y qoǵamdyq tasymalmen qamtamasyz etilgenin jetkizdi.
2017 jyldyń 6 aıynda tórt - 3 aýdanaralyq, 1 oblysaralyq turaqty baǵyt ashyldy. Olar - «Shymkent-Boraldaı», «Qoshqar Ata-Almaly-Shymkent», «Túrkistan-Jibek Joly» jáne oblysaralyq «Shymkent-Aqtóbe» baǵyttary. Jyl sońyna deıin Tólebı aýdanynyń 4 eldi mekeni, Ordabasy aýdanynyń 4 eldi mekeni, Báıdibek aýdanynyń 4 eldi mekeni qoǵamdyq kólikpen qamtamasyz etiletin bolady. Jýyrda Shymkent qalasynyń shalǵaı shaǵyn aýdandarynda jáne jolaýshylar aǵyny tómen kóshelerde turatyn turǵyndar qoǵamdyq kóliktermen qamtamasyz etiletin bolady», - dedi M.Myrzabaev.
Jıynda, munan bólek, avtobýstardy jańalaý, olardy GPS quraldarymen jabdyqtaý, zańsyz jolaýshylar tasymalyna tosqaýyl qoıý syndy túrli baǵyttardaǵy atqarylǵan jumystar da aıtyldy.
Odan soń basqarmanyń avtomobıl joldary salasynda atqarylǵan sharýalarǵa toqtalǵan R.Ibragımov Ońtústik Qazaqstan oblysynda avtomobıl joldary men eldi meken kósheleriniń jalpy uzyndyǵy 20 928,9 shq. quraıtynyn jetkizdi. Olar - respýblıkalyq mańyzy bar 837 shq. (95% qanaǵatty), oblystyq mańyzy bar 4 261,2 shq. (58,7% qanaǵatty), aýdandyq mańyzy bar joldar 1 642,7 shq. (64,4% qanaǵatty), eldi-meken kósheleri 11 377,1 shq. (59,9% qanaǵatty) jáne Shymkent qalasy kósheleri 2 810,9 (41,4% qanaǵatty).
«2017 jyly avtomobıl joldary salasyn damytýda 584 nysan nemese 1 570,9 shq. joldar men kósheler qurylys-jóndeý jumystarymen qamtylyp jatsa, 6 aıdyń qorytyndysyna sáıkes, búginge deıin 2 kópirdiń ortasha jáne 1 avtomobıl jolynyń kúrdeli jóndeý jumystary júrgizilip, paıdalanýǵa berildi», - dedi R.Ibragımov.
