OQO-da jyl basynan beri óndiris barysynda 7 jumysshy qaza bolǵan
ShYMKENT. QazAqparat - Ońtústik Qazaqstan oblysynda jyl basynan 30 jumysshy óndiris barysynda zardap shekti. Bul týraly óńirdiń bas eńbek ınspektory Almasbek Mamytbekov málimdedi, dep habarlaıdy QazAqparat tilshisi.
Oblystyq eńbek ınspektsııasy basqarmasy basshysynyń sózinshe, óndiris barysynda 32 adam zardap shegip, olardyń 7-ýi qaıtys bolǵan. Ótken jyly 127 adam zardap shegip, 19 adam kóz jumǵan. Mundaı jaǵdaılardyń bolýyna jumys berýshilerdiń qyzmetkerge qaýipsiz eńbek tásilderin jetkilikti úıretpeýi, jumysty talapqa saı uıymdastyra almaý jáne eńbekti qorǵaý erejeleriniń buzylýy sebep bolǵan.
Atalǵan basqarma qyzmetkerleri aǵymdaǵy jyldyń birinshi toqsanynda oblystaǵy kásiporyn men mekemelerde 179 tekserý júrgizgenin aıtady. Tekserý kezinde 242 zańbuzýshylyq deregi anyqtalǵan. Azamattardyń jumysqa ornalasýy kezinde eńbek kelisimshartyn túzýdi talap etpeıtini belgili bolǵan. Anyqtalǵan zańbuzýshylyqtar negizinde 124 nusqama berilipti.
Sondaı-aq eńbek zańnamasynyń buzylýy boıynsha 38 jumys berýshige 6 mln teńge kóleminde aıyppul salynǵan. 6 adam eńbek zańnamasyn buzǵany úshin tártiptik jazaǵa tartylsa, eńbekti qorǵaý talaptaryn buzǵany úshin 14 azamatqa qatysty is quqyq qorǵaý organdaryna joldanǵan.
