OQO-da jyl basynan beri 8,4 mlrd teńge ıgerilmeı qalǵan

ShYMKENT. QazAqparat - Ońtústik Qazaqstan oblysynda keı basqarmalar men aýdan-qala ákimderi bar qarjyny uqsata almaı otyr. Oǵan dálel jyl basynan beri 8,4 mlrd teńge ıgerilmeı qalǵan. Bul týraly selektorlyq jıynda oblys ákimi Janseıit Túımebaev aıtty, dep habarlaıdy QazAqparat HAA tilshisi.

Jıynda oblystyń áleýmettik - ekonomıkalyq damýy men bıýdjettiń oryndalýy, «Nurly jol» baǵdarlamasynyń júzege asý barysy talqylandy. Máselen, byltyrǵy jyldyń 5 aıymen salystyrǵanda ınvestıtsııa kólemi Arysta - 71,3, Shardarada - 63,4, Kentaýda 45,3, Maqtaralda 43,3, Otyrarda  41, Qazyǵurtta 28, Saryaǵashta 20, Tóle bı aýdanynda 4 paıyzǵa kemigen. Qyrýar qarjy bólinip, tıisti tapsyrmalar berilgenimen der kezinde oryndalmaǵan. Sala mamandarynyń sózinshe kórsetkishtiń quldyraýyna aýdandardaǵy ahýal sebep kórinedi. Al, memlekettik «Nurly Jol» baǵdarlamasynyń aımaqtaǵy oryndalýy da kóńil kónshitpeı otyr. Óıtkeni, oblysta atalmysh joba aıasynda salynyp jatqan nysandar bitpeı jatyp, synǵa ushyraýda.

«Sizder jumys bitken kezde kemshilikterdi endi taýyp otyrsyzdar. Jumystar bastalǵan kezde taýyp, der kezinde mundaı qurylys fırmalarynan qutylǵan durys. Eger osylaı jumys isteıtin bolsańyzdar, jaýapkershiliktiń joqtyǵynan nysan der kezinde berilmeıtin bolady. Halyq zardabyn shegedi. Qadaǵalańyzdar. Árbir mektep árbir aýdan úshin úlken kómek. Qanshama otbasy, semıa balalar úshin qýanysh», - dedi aımaq basshysy Janseıit Túımebaev.

Osyndaı kemshilikterge kóz jetkizgen óńir basshysy bul máselelerdiń qatań baqylaýda bolatynyn jetkizdi. Tipti, osy jartyjyldyqtyń qorytyndysyna qaraı basshylardyń qyzmettik máselesiniń qaralatynyn da eskertti.

«Jartyjyldyqtyń qorytyndysy jaqyndap qaldy, synaq merzimi de aıaqtaldy. Jartyjyldyqtyń statıstıkalyq qorytyndylary shilde aıynyń 25-ne tolyq shyǵady. Osyǵan oraı, oblystyq ákimdiktiń apparat basshysy Áýelhan Eltaıuly, 1-shi jartyjyldyqtyń qorytyndysymen aýdan, qala ákimderin jáne basqarma basshylaryn tamyz aıynyń 1-shi onkúndiginde tyńdaý boıynsha kestesin ázirlep, bekitýge usynyńyz. Indıkatorlardy oryndamaǵan aýdan, qala ákimderiniń jáne basqarma basshylarynyń jaýakershiligi qatań qaralady, ıaǵnı «qyzmetine sáıkestigi» máselesine deıin qaraımyz»,- dedi oblys ákimi.

Oblys ákiminiń sózinshe óz isine salǵyrt qaraǵan qyzmetkerler qatań jazalanbaq. Tipti, keıbiri jumysynan ketýi de múmkin.