OQO-da jyl basynan beri 6 adam ýly gazdan qaıtys bolǵan
ShYMKENT. QazAqparat - Ońtústik Qazaqstan oblysynda jyl basynan beri ýly gazben ýlanýdyń 10 oqıǵasy tirkelip, 17 adam aýrýhanaǵa túsken. Onyń ishinde 11 adam qatty otyn men tabıǵı gazdan ýlanyp, 6 adam qaıtys bolǵan. Bul týraly búgin óńirdiń Tótenshe jaǵdaılar departamenti basshylyǵy málimdedi, - dep habarlaıdy QazAqparat HAA tilshisi.
Departament bastyǵy Nurbolat Derbisovtyń sózinshe, qaıǵyly jaǵdaılar kóbinde turǵyndardyń jylytý maýsymynda órt qaýipsizdik qaǵıdalaryn buzý sebebinen oryn alady. Qatty otyndy paıdalanatyn peshterdiń jáne tabıǵı gazdaǵy jylytý qazandyqtarynyń, sondaı-aq sý jylytqysh quraldarynyń jaramsyzdyǵy jáne durys paıdalanbaýy, jylytý júıeleriniń aqaýlyqtary jáne konstrýktsııalardyń kemshilikteri, jylytý quraldaryn tez janatyn zattarǵa jaqyn ornalastyrý keleńsiz jaǵdaılarǵa ákep soqtyrady. Máselen, qatty otyndy paıdalanatyn peshterdi gazǵa aýystyryp, peshtiń qubyrlaryn aýystyrmaı, paıdalanady. Al, peshterdiń qubyrlary gazǵa beıimdelmegendiginen, ýlaný oqıǵalary tirkelip jatady. Sol úshin sala mamandary halyqty jylytý quraldaryn ornatý, ony paıdalaný kezinde órt qaýipsizdik talaptaryn saqtaý qajettigin eskertedi. Qajet bolǵan jaǵdaıda gazdabylqaqqyshty ornatsa bólmeniń ishindegi gazdyń kontsentratsııasyn baqylap, tónip turǵan qaýip-qater týraly ýaqtyly eskertýge kómektesetinin aıtady.
«Jylytý maýsymynda azamattardyń ólimin jáne ýlanýynyń aldyn alý boıynsha jasóspirimdermen úlken jumystar júrgiziledi. Árıne, ótkizilip jatqan is-sharalar óziniń jaqsy nátıjelerin berip otyr. Atap aıtsaq, 2016 jylmen salystyrǵanda jyldyń basynan jylytý maýsymynda qaıtys bolǵandardyń sany 50%, al jaraqattanǵandardyń sany 25% tómendep otyr. Ótken jyly osy ýaqyt aralyǵynda 9 oqıǵa tirkelip, 22 adam ýlanǵan, onyń ishinde 12 adam qaıtys bolǵan edi», - deıdi N. Derbisov.
