OQO-da jyl basynan beri 5 myńǵa jýyq júk kóligi ereje buzǵan
ShYMKENT. QazAqparat - Ońtústik Qazaqstan oblysynda jyl basynan beri 5 myńǵa jýyq júk kóligi ereje buzǵan. Olarǵa qatysty óńirlik kóliktik baqylaý ınspektsııasy tıisti hattama toltyryp, 30 mln teńge aıyppul óndirildi, dep habarlaıdy QazAqparat HAA tilshisi.
Alaıda óńirde júk kólikterin tizgindegenderge aıyppul salý jumystarynyń nátıjesi baıqalmaıdy. Óıtkeni, qalaǵandarynsha júk tıep alyp, qara jolda júıtkıtinder sany kún ótken saıyn kóbeımese, azaımaı otyr. Oǵan jemqorlyqqa qarsy is-qımyl agenttiginiń óńirdegi ókilderi men ınspektsııa mamandary birlese júrgizgen kezekti ret reıd júrgizý kezinde kóz jetkizdi.
«Negizinde oblysta 12 765 shaqyrym jol bar. Sondaǵy jaǵdaıdy eki mobıldi topqa birikken 18 ınspektor ǵana baqylaý jasaıdy. Eger joldyń uzaqtyǵyn eseptesek, onyń barlyǵyn baqylaý múmkin emes. Sondyqtan oblystyq prokýratýra bar, transporttyq prokýratýra bar, ákimshilikter bar, solarmen birge baqylaý júrgizemiz»,-deıdi Ońtústik Qazaqstan oblysy boıynsha kóliktik baqylaý ınspektsııasynyń bólim basshysy Erjan Qalymbetov.
Mamandardyń aıtýynsha, joldaǵy erejeni kóbinese, karerlerden tas tasymaldaıtyn júk kólikteri buzady. Sondyqtan ınspektsııa ótken jyldan beri osyndaı oryndarda da tekserý jumystaryn júrgizýdi qolǵa alǵan. Nátıjesinde talapqa saı jumys atqarmaıtyn 23 karer anyqtalyp, olardyń isine shekteý qoıyldy.
