OQO-da jyl basynan beri 5 bala sýǵa ketip ajal qushty
ShYMKENT. QazAqparat - Ońtústik Qazaqstan oblysynda jyl basynan beri 5 bala sýǵa ketip ajal qushty. Qutqarýshylardyń málimetinshe kámelet jasyna tolmaǵandardyń qaıǵyly jaǵdaılarǵa tap bolýyna ata-analarynyń qaraýsyz qaldyrýy sebep bolǵan, dep habarlaıdy QazAqparat HAA tilshisi.
Taǵy bir sebep, óńirde kúnniń kúrt jylynýynan balalar sýǵa shomylýdy bastap ketken. Máselen, Saryaǵash aýdanynda 6 synyp oqýshysy jergilikti kanaldardyń birine shomylýǵa baryp, batyp ketken. Onyń shomylýǵa ketkeninen ata-anasy beıhabar bolypty. Dál osyndaı jaǵdaılar óńirdiń ózge aýdandarynda da oryn alǵan.
Sýdan qutqarýshylar qazirgi tańda Otyrar aýdanynda sýǵa batqan 25 jastaǵy turǵyndy izdestirip jatyr. Shymkent qalalyq sýdan qutqarý jasaǵynyń bes birdeı qyzmetkeri Arys ózeni aýmaǵyn qarap júr.
«Bizge bul azamattyń sýǵa batqany jóninde habar 10 sáýir kúni kelip tústi. Oblys ortalyǵynan 5 qutqarýshy men 1 tehnıka jiberildi. Qazir qutqarýshylar 8-11 metr tereńdikke túsip, izdestirip jatyr. Motorly qaıyq mingender ózenniń aǵysymen 30 shaqyrym jerge deıin qarap shyqty. Alaıda joǵalǵan azamat tabylmady. Іzdeý sharalary áli jalǵasyp jatyr»,- deıdi Shymkent qalalyq qutqarý jasaǵynyń jetekshisi Pavel Vıshenın.
Aıta keteıik, ótken jyly osy ýaqt aralyǵynda 11 adam sýǵa ketip, qaza tapqan bolatyn. Onyń 8-i kámelet jasyna tolmaǵan balalar.
