OQO-da jyl basynan beri 3 myńnan asa kásipkerge qarjylaı emes qoldaý kórsetilgen
ShYMKENT. QazAqparat - Ońtústik Qazaqstan oblystyq Kásipkerlik palatasy bıznespen aınalysqysy keletin jeke tulǵalarǵa qarjylyq emes qoldaý kórsetip keledi. Búgingi kúnge deın palata tarapynan 13 myńnan asa shaǵyn jáne orta bıznes ókilderi tegin qyzmet túrlerin alǵan. Al, bılyǵy jyldyń basynan 3 myńnan asa kásipkerge 5491 qyzmet túri kórsetilgen. Bul týraly búgin óńirlik palatanyń dırektory Asqar Ábýbákirov baspasóz máslıhatynda málimdedi, dep habarlaıdy QazAqparat HAA tilshisi.
Óńirlik palata dırektorynyń aıtýynshpa, kásibin dóńgeletip júrgender kóbinde jer telimin alý men salyq tólemderine qatysty jáne kedendik rásimder júrgizý boıynsha kómek suraǵan. Sondaı-aq túrli tekserýler men orynsyz aıyppul salý jaǵdaılary da kásipkerlerdi ábden sharshatqany belgili boldy. Osyndaı keleńsizdikterdi boldyrmas úshin Kásipkerlik palatasy arnaıy call ortalyǵynyń qyzmetin usynyp otyr. ıAǵnı kez-kelgen bıznes ókili ózin mazalaǵan suraqtar men usynys pikirlerin ortalyqqa habarlasyp, aıta alady. Budan bólek, Asqar Ábýbákirov palata ishinen Qytaı elimen kásipkerlik baılanysty nyǵaıtýǵa kómektesetin arnaıy maman baryn habarlady. Kúnshyǵys elinde 20 jyl boıy turǵan bul azamat endi kúngeılik kásipkerlerge saýda jasaýǵa, qujattar rásimdeýge de qolǵabys etetinin aıtyp otyr. Al buǵan deıin kásipkerlerge kórsetiletin ózge kómekter jalǵasa beretinin tilge tıek etti.
«Kásibin jańadan bastap jatqan azamattarǵa bıznes josparyn tegin jasap beremiz. Ol úshin qandaı qarajat qujattaryn jınaý kerek, ony tolyqtaı túsindirip, birge jınaımyz. Sebebi qazirgi tańda sharýalar ol týraly bile bermeıdi. Sol sebepten bizdiń maqsatymyz aýdandarǵa tikeleı kómektesý, osy jobalardy júrgizip, qarjysyn alyp berý bolyp otyr»,-dedi Asqar Ábýbákirov.
