OQO-da jyl basynan beri 200-den asa adam jol apatynan kóz jumǵan
ShYMKENT. QazAqparat - Ońtústik Qazaqstan oblysynda jyl basynan beri segiz aıda 218 adam jol apatynan kóz jumǵan. Bul týraly QR Bas prokýratýrasy Quqyqtyq statıstıka jáne arnaıy esepke alý komıtetiniń OQO boıynsha basqarmasy málimdedi, dep habarlaıdy QazAqparat HAA tilshisi.
Basqarmanyń málimetinshe, osy ýaqyt aralyǵynda ońtústikte bas-aıaǵy 1282 jol-kólik oqıǵasy tirkelip, 1821 adam túrli dene jaraqatyn alǵan. Jol apattarynyń basym bóligi oblys ortalyǵynda tirkelip otyr.
Shymkentte segiz aı ishinde 471 oqıǵa oryn alsa, odan keıin Saryaǵash aýdanynda 200 ret kólikter soqtyǵysyp qalǵan. Al, Maqtaral aýdanynda 141, Túrkistanda 92 jaǵdaı bolǵan. Jol apattarynyń 63 paıyzynda júrgizýshiler jaıaý júrginshini qaǵyp ketken. Sondaı-aq, rýlde mas kúıinde avtokólik basqarǵan tulǵalardyń kinásinen 22 oqıǵa tirkelgen.
Júrginshiniń kinásinen 2 jol-kólik oqıǵasy bolsa, 109 jaǵdaıda jol apatyn jasaǵan júrgizýshi oqıǵa ornynan qashyp ketken.
Adam ólimi boıynsha da osy joǵaryda atalǵan qala, aýdandar aldyńǵy qatarlarda tur.
Atap aıtqanda, jol-kólik oqıǵasy zardabynan Shymkent qalasy men Saryaǵash aýdanynyń árqaısysynda 39 adam, Túrkistan qalasynda - 20, Maqtaral aýdanynda - 18, Ordabasy aýdanynda - 17 adam jol apatynan qaza tapqan.
Sala mamandary jol apatynan ásirese balalar zardap shegedi dep otyr. Mysaly, osy jyldyń 8 aıynda oryn alǵan 1282 jol-kólik oqıǵasynyń 463-inde balalar zardap shekken. Olardyń 433-i jaraqat alsa, ókinishke qaraı 30-y kóz jumǵan.
Sońǵy 5 jylǵa júrgizilgen taldaý qortyndysy balalar úshin tamyz jáne mamyr aılary jolda júrýge qaýipti bolatynyn kórsetti. Osy mezgilde jol-kólik oqıǵasyna ushyraǵan bala sany artyp otyr.
