OQO-da jyl basynan beri 13 bala sýǵa aǵyp opat boldy
ShYMKENT. QazAqparat - Ońtústik Qazaqstan oblysynda jyl basynan beri 19 adam sýǵa batyp, ajal qushty. Ókinishke oraı onyń 13-i kámelet jasyna tolmaǵan balalar bolyp otyr. Óńirdiń tótenshe jaǵdaılar qyzmeti osyǵan oraı dabyl qaǵyp, ata-analardy saqtyq sharalaryn qolǵa alýǵa shaqyrady, dep habarlaıdy QazAqparat HAA tilshisi.
Máselen, ótken aptanyń ishinde óńirde tórt adam sýǵa aǵyp opat bolǵan. Ordabasy aýdanynda 3 jasar búldirshin aryqtaǵy sýǵa batyp ketip, onyń óli denesin sol mańdaǵy adamdar alyp shyqqan. Al, Maqtaral aýdanynda 13 jastaǵy jasóspirim «Dostyq» kanalynyń ruqsat etilmegen jerine shomylypty. Kýágerlerdiń sózinshe, balany aǵyn sý tartyp ketip, opat boldy. Sol sııaqty Otyrar aýdanynda mal baǵýǵa shyqqan 8 jasar bala baıqaýsyzda Arys ózenine túsip ketedi. Onyń máıiti tek keshki altylar shamasynda sýdan shyǵaryldy.
Budan bólek, Saryaǵash aýdanynda 38 jastaǵy turǵyn úıinen shyǵyp ketip, qaıtyp oralmaǵan. Ony izdeýge jergilikti tótenshe jaǵdaılar bóliminiń 5 qyzmetkeri men 1 tehnıka, tártip saqshysy jáne aýyldyń 20 turǵyny jumyldyrylǵan. Onyń denesi sol mańdaǵy kanaldardyń birinen eki kúnnen keıin tabyldy.
