OQO-da júıeli túrde para alǵan sheneýnikterge qatysty sot bastaldy

ShYMKENT. QazAqparat - Ońtústik Qazaqstan oblysynda qylmystyq top quryp, júıeli túrde para alǵan sheneýnikterge qatysty atyshýly sot otyrysy bastaldy. Abaı aýdandyq sotynda Oblystyq jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary  Sátjan Polatov pen taǵy tórt sheneýnikke aıyp taǵyldy, dep habarlaıdy QazAqparat tilshisi.

Sotta Polatovtan basqa tórt sheneýniktiń, ıaǵnı Oblystyq jumyspen qamtýdy úılestirý jáne áleýmettik baǵdarlamalar basqarmasyna qarasty memlekettik kommýnaldyq kásiporyn dırektory men aýdandyq bólimderdiń basshylarynyń qylmystary aıtyldy.

Olarǵa Qylmystyq kodekstiń 366 baby 3 bóligi «Para alý» (Adamdar tobynyń aldyn ala sóz baılasýymen qorqytyp alý arqyly parany iri mólsherde alý, birneshe ret jasalsa)  boıynsha aıyp taǵyldy. Belgili bolǵandaı, qylmystyq toptyń quramynda beseýden bólek taǵy eki sheneýnik bar bolyp shyqty. Olardyń biri Ordabasy aýdandyq jumyspen qamtýdy úılestirý jáne áleýmettik baǵdarlamalar bóliminiń burynǵy basshysy Ótegenov bolǵan. Alaıda ol qylmystyq top múshelerin ustaýǵa kómekteskeni úshin qylmystyq isi bólek qaralyp, 4 jylǵa bas bostandyǵynan aıyryldy. Taǵy bir aıyptalýshynyń isi endi sotqa ótkizilgen.

Sotqa qatysqan memlekettik aıyptaýshy Almasbek Meńlibekovtiń sózinshe, top músheleri halyqty nátıjeli jumyspen qamtý baǵdarlamasyna bólingen qarajattardy berý kezinde,  ár túrli paıyzda para alyp otyrǵan. Sátjanov basqarǵan top «Lıder - PRO» oqý ortalyǵynan kesilimshartty júzege asyrý úshin aqsha talap etken. Qysqa merzimde mamandar daıarlaıtyn ortalyq memleket qarjysyna qol jetkizýi úshin jalpy somadan 20-30 paıyzǵa deıin para berýge májbúr bolǵan. Keı kezderi shendiler tipti qorqytyp alý arqyly aqsha alyp kelipti. Osylaısha 6 mln teńgege deıin para alǵany dáleldengen. Sebebi, sheneýnikterdiń qyzmettik bólmeleri men uıaly telefondary óńirdegi Sybaılas jemqorlyqqa qarsy is-qımyl departamentiniń qyzmetkerlerimen  uzaq ýaqyttan beri tyńdalǵan eken.  Sot kezinde Sátjan Polatov pen aıyptalýshy Ordabaev óz kinálaryn tolyq moıyndady. Ózgeleri qylmys jasamadyq dep bas tartty.

Eger sheneýnikterdi sot taǵylǵan aıyppen kináli dep tapsa, onda bul bappen olardyń múlki tárkilenip, belgili bir laýazymdardy atqarý nemese belgili bir qyzmetpen aınalysý quqyǵynan ómir boıyna aıyrý qarastyrylǵan. Sondaı-aq  paranyń jetpis eselengen somasy mólsherinde aıyppul salýǵa ne jeti jyldan on eki jylǵa deıingi merzimge bas bostandyǵynan aıyrýǵa jazalanatyn bolady.