OQO-da Jumat Shanınniń 125 jyldyq mereıtoıy atalyp ótti
ShYMKENT. QazAqparat - Ońtústik Qazaqstan oblysynda qazaqtyń tuńǵysh rejısseri, dramatýrgi, halyq ártisi Jumat Shanınniń 125 jyldyǵyna oraı oblys ortalyǵyndaǵy kóshege memorıaldy taqta qoıyldy. Taqtanyń ashylý saltanatyna Jumat Shanınniń urpaqtary men zııaly qaýym ókilderi qatysty. Saltanatqa sondaı-aq, oblys ákiminiń birinshi orynbasary Ulasbek Sádibekov qatysyp, óńir basshysynyń quttyqtaýyn jetkizdi, dep habarlaıdy QazAqparat tilshisi.
Qazaqtyń ulttyq kásibı teatrynyń negizin qalaýshylarynyń biri, qoǵam jáne teatr qaıratkeri Jumat Shanınniń qurmetine oblystyq qazaq akademııalyq drama teatrynda sahna sańlaǵynyń 125 jyldyǵyna oraı saltanatty jıyn ótti.
«Teatr dánin tamyrlatqan tarlan» atty saltanatty sharada qazaq óneriniń qýatty talantynyń esimi ulyqtalyp, eske alyndy. Jumat Shanınniń «Arqalyq batyr» tarıhı dramasynyń premerasy sahnalanyp, el yqylasyna bólendi. Kompozıtsııaǵa qatysqan akterlardyń sheberligi men ujym músheleriniń erik-jigerleri sharany joǵary deńgeıde ótkizýge múmkindik berdi.
