OQO-da jol talǵamaıtyn tehnıkalar qıyn joldarmen júrip, arnaıy tekserýden ótti
ShYMKENT. QazAqparat - Ońtústik Qazaqstan oblysynda jol talǵamaıtyn tehnıkanyń kóktemgi marshy uıymdastyrylyp, kólikter qıyn joldarmen júrip ótti . Qutqarýshylar osylaısha tótenshe jaǵdaılardy joıý boıynsha jumystarǵa paıdalanatyn avtokólikterdiń daıyndyǵyn tekserdi, - dep habarlaıdy QazAqparat HAA tilshisi.
Óńirdiń tótenshe jaǵdaılar qyzmetine qarasty 3 jol talǵamaıtyn kólik tórt kún boıy úsh aýdannyń jolymen júrip ótken. Jedel-qutqarý jasaǵynyń jumys josparyna sáıkes Shymkent-Báıdibek, Báıdibek-Sozaq baǵyttary boıynsha taýly aımaqtaǵy jaǵdaıda tekserildi. Qutqarýshylardyń sózinshe, arnaıy kólikter avarııalyq-qutqarý jáne izdestirý-qutqarý jumystaryn júrgizýge daıyn bolyp shyqqan. Aıta keteıik, osy kólikter bıylǵy qysta tótenshe jaǵdaılar qyzmetkerlerine kóp qolǵabys etti. Qar qursaýynda qalǵan aýyldarǵa dárigerlerdi jetkizip, jolda qalǵan jolaýshylardy arnaıy beketterge alyp barǵan bolatyn. 
