OQO-da jerlerdiń elektrondy topyraq kartasy ázirlenýde

ASTANA. QazAqparat - Ońtústik Qazaqstan oblysynda jerlerdiń elektrondy topyraq kartasy ázirlenýde.Bul týraly oblystyq Jer qatynastary basqarmasynyń basshysy Sozaqbaı Ábdiqulov óńirlik kommýnıkatsııalar qyzmetinde ótken baspasóz jıynynda málim etti. Bul týraly ákimniń baspasóz qyzmeti habarlady.

Saladaǵy ótken jyly atqarylǵan jumystar men aldaǵy josparlar jaıyn baıandaǵan Sozaqbaı Isaulynyń aıtýynsha, atalǵan elektrondy topyraq kartasynda egistik jerlerdiń topyraq qunarlyǵynyń deńgeıi men erozııaǵa ushyraǵan jerlerdiń kólemi jáne erozııa túrleri týraly qajetti málimetter engiziledi. Sol arqyly erozııany toqtatý jáne topyraqtyń qunarlyǵyn saqtaý maqsatynda tıisti agrotehnıkalyq sharalardy júrgizý usynylady.

«Qazirgi tańda, aýyl sharýashylyǵy jerleriniń elektrondyq bazasyn daıyndaý jumystary Túrkistan, Kentaý qalalary men Túlkibas, Otyrar aýdandarynda atqarylyp, Túlkibasta tolyqtaı aıaqtaldy. Odan bólek, osy jyly mundaı jumystar Báıdibek aýdany men Arys qalasyndaǵy aýyl sharýashylyǵy maqsatyndaǵy jerlerde bastalady dep kútilip otyr. Jalpy, oblystaǵy barlyq aýdan, qalalarda osyndaı kartalardy ázirleý jumystaryn 2020 jylǵa deıin aıaqtaımyz degen jospar bar», - dedi S.Ábdiqulov.

Basqarma basshysynyń sózinshe, aýyl sharýashylyǵy daqyldarynyń ónimdiligin arttyrýdyń basty sharty - egistik alqaptary topyraqtarynyń qunarlyǵyna tikeleı baılanysty. Al topyraqtyń qunarlyǵy dep onyń tabıǵı jáne mádenı ósimdikterdiń qalypty ósýi men damýyn qamtamasyz etý qabiletin aıtady. Topyraq qunarlyǵynyń dengeıi onyń quramyndaǵy qarashirindiniń (gýmýstyń) mólsherimen eseptelinedi. Qarashirindi qanshalyqty kóp bolsa, topyraq sonshalyqty qunarly bolyp eseptelinedi.

Jalpy, Ońtústik Qazaqstan oblysynyń jer qory - 11725,8 myń ga qurasa, onyń ishinde aýyl sharýashylyq maqsatyndaǵy paıdalanylyp jatqan jerler - 6815,7 myń ga. Al egistik jerlerdiń kólemi 911,4 myń ga (o.i. sýarmaly 457,3 myń ga), jaıylymdyq 5635,8 myń ga, shabyndyq 84,5 myń ga, kóp jyldyq ekpeler 29 myń ga.

Oblys boıynsha jer qatynastary salasynyń aldaǵy 5 jyldyq jospary, ıaǵnı 2017-2021 jyldar aralyǵyndaǵy jumystardy 7 baǵyt boıynsha iske asyrý josparlanǵan. Olar - aýyl sharýashylyǵy maqsatyndaǵy jerlerdi aınalymǵa engizý, sýarmaly jerlerdiń kólemin ulǵaıtý jáne qazirgi jaǵdaıyna taldaý júrgizý, oblystaǵy jaıylym jer máselesi, arnaıy jer qoryndaǵy jerlerdi tıimdi paıdalaný, egistik jerlerdegi topyraqtyń qunarlyǵyn arttyrý, aýyl sharýashylyǵy jáne kásipkerlerge bólingen jerlerge júrgizilgen túgendeý jumystary týraly, ındýstrııaldy aımaqtardaǵy jerlerdiń ıgerilý jaǵdaıy men jerge qatysty qujattaryn rásimdeý máselesi.