OQO-da jergilikti bıýdjettiń kiristeri 17,4 paıyzǵa artqan

Búgin bul týraly OQO óńirlik kommýnıkatsııalar qyzmetinde ótken brıfıngte oblystyq qarjy basqarmasynyń basshysy Abdrahman Tasybaev málim etti, dep habarlaıdy óńir basshysynyń baspasóz qyzmeti.

 Onyń aıtýynsha, oblys boıynsha 2017 jyly memlekettik bıýdjettiń kirister jospary 102,1 paıyzǵa oryndalyp, jospardan tys 6,5 mlrd teńge qosymsha kirister túsken. Sondaı-aq, byltyr respýblıkalyq bıýdjet 101,3 paıyzǵa oryndalyp, 2,5 mlrd teńge artyq  túsip otyr.

Budan bólek, QR Úkimetimen bekitilgen Jekeshelendirýdiń 2016-2020 jyldarǵa arnalǵan Keshendi josparyna sáıkes, oblystyq jáne aýdandyq, qalalyq kommýnaldyq menshiktegi 21 nysannyń 13-i elektrondy saýda-sattyqqa qoıylyp, onyń 10-y jalpy 557,63 mln  teńgege satylǵan.

«Segiz nysan elektrondy satylymǵa shyǵarylyp, onyń 7-i keıinnen satyp alý quqyǵymen senimgerlik basqarýǵa jalpy 12183,7 mln teńgege berildi. Oblystyq kommýnaldyq múlikti satý boıynsha byltyr 2016 jylmen salystyrǵanda jergilikti bıýdjetke 204 mln teńge artyq túsken», - dedi Abdrahman Batyrbekuly.

 Elbasy N.Á. Nazarbaevtyń 2017 jyly sáýir aıynda oblysqa jasaǵan sapary kezindegi tapsyrmasyna sáıkes, salyq salý bazasyn keńeıtýge jáne jergilikti bıýdjetterdiń túsimderin ulǵaıtý boıynsha taldaý jumystary júrgizilip, oblys bıýdjeti qosymsha 16,8 mlrd teńgege ulǵaıtylyp, jalpy 124,4 mlrd teńgeni qurady.

 Aıta keterligi, ótken jyly bıýdjet shyǵystarynyń 62,8 paıyzy áleýmettik salaǵa baǵyttalǵan. Máselen 2016 jylmen salystyrǵanda bilim berý salasyna bólinetin qarjy - 23 mlrd teńgege, áleýmettik kómek jáne áleýmettik qamsyzdandyrýǵa - 13,2 mlrd teńge, mádenıet, sport, týrızm jáne aqparattyq keńistik salasyna qaralatyn qarjy - 7 mlrd teńgege artyp otyr.

 2017 jyldyń qorytyndysy boıynsha oblystyq kommýnaldyq menshiktegi turǵyn emes jaıdy jalǵa berýde 354 kelisimshart túzilip, naqty bıýdjetke 54,7 mln teńge túsim túsken. Bul 2016 jylmen salystyrǵanda 22,7 mln teńgege artqandyǵyn kórsetip otyr.