OQO-da jeńil ónerkásiptiń damýyna úndi kásipkerleri de úlesin qosyp keledi
ShYMKENT. QazAqparat - Ońtústik Qazaqstan oblysynda jeńil ónerkásiptiń damýyna úndi kásipkerleri de úles qosyp keledi. Bul týraly aımaq basshysy Janseıit Túımebaev toqyma ónerkásibin damytý boıynsha qurylǵan qazaq-úndi jumysshy tobynyń ókilderimen kezdesý barysynda atap ótti. Basqosýda jumysshy toptyń Shymkentte ótetin 4-shi otyrysynyń josparlary talqylanyp, eki jaqty ekonomıkalyq baılanystardyń jaı-kúıi talqylandy, dep habarlaıdy QazAqparat HAA tilshisi.
Oblys ákimi Úndistan Jeńil ónerkásibi mınıstrliginiń birlesken hatshysy Gýpta Sýbrata myrzaǵa óńirdiń ekonomıkalyq damý barysy men ınvestıtsııalyq tartymdylyǵyn baıandady.
«Qazaqstandaǵy toqyma ónerkásibi damýynyń mańyzdy áleýeti Ońtústik Qazaqstan oblysynda. Bizdiń óńirde maqta sharýashylyǵy jaqsy damyǵan. Oblysymyzda «Ońtústik» arnaıy ekonomıkalyq aımaǵy qurylyp, onda tigin tsehtary men fabrıkalarymyz jumys istep jatyr. Endigi másele - jeńil ónerkásipti damytýda Úndistan memleketimen tyǵyz qarym-qatynas ornatyp, ortaq jobalardy birlesip iske asyrý. Bul rette óńirde sheteldik ınvestorlarǵa barlyq qoldaýlar jasalanady. Ónerkásipke qajetti jer telimi berilip, barlyq ınfarqurylymdyq qajettiliktermen qamtamasyz etetin bolamyz», - dedi Janseıit Qanseıituly.
Óz kezeginde Úndistan tarapy da birlesken joba aıasynda jumys isteýge joǵary qyzyǵýshylyq tanytty. Jeńil ónerkásip salasynda eńbek etip júrgen óńir kásipkerlerin 30 maýsym kúni Úndistanda ótkeli otyrǵan iri jermeńkege qatysýǵa shaqyrdy. Sebebi, jyl saıyn 400 - 450 myń tonna shıtti maqta jınalatyn óńirde tabıǵı shıkizattan jasalǵan ónimge suranys ta mol.
«Úndistanda jeńil ónerkásiptiń jyldyq saýda aınalymy 140 mlrd AQSh dollaryn quraıdy. Onda toqyma, maqta, mata ónimderin óndiretin bir myńǵa jýyq kompanııanyń fabrıkalary jumys isteıdi. Ońtústik Qazaqstan oblysyna jasaǵan bul saparymyz jemisti jáne nátıjeli bolady dep senemin», - dedi Úndistan Jeńil ónerkásibi mınıstrliginiń birlesken hatshysy Gýpta Sýbrata.
Aıta keteıik, qazaq-úndi jumysshy toby 2008 jyly qurylǵan bolatyn. Aldaǵy jyly on jyldyǵyn atap ótkeli otyrǵan toptyń ońtústiktegi sapary 2 kúnge josparlanyp otyr.
