OQO-da jeńgetaılar kámeletke tolmaǵan qyzdy saýdaǵa salǵan
ShYMKENT. QazAqparat - Ońtústik Qazaqstan oblysynda adam saýdasy men jeńgetaılyqty, prıton ustaý jáne jezókshelikpen aınalysýǵa tartýdy anyqtaý boıynsha «STOP-trafık» jedel profılaktıkalyq is-sharasy ótti. Óńirdiń Іshki ister depatramentine qarasty uıymdasqan qylmysqa qarsy kúres basqarmasy qyzmetkerleri uıymdastyrǵan sharada adam urlaý jáne zańsyz bas bostandyǵynan aıyrý faktilerin eskertý jaıttary da tekserildi, dep habarlaıdy QazAqparat HAA tilshisi.
Nátıjesinde 9 jeńgetaılyq jaıty anyqtalyp, 58 jeńil júristi áıel esepke alyndy. Jeńgetaılardyń kámeletke tolmaǵan qyzdy saýdaǵa salý deregi tirkelip, olardyń ústinen Qylmystyq kodekstiń 135-babymen is qozǵaldy.
Sonymen, reıdtik shara kezinde polıtseıler qaladaǵy saýnalardyń birinde tutynýshylarǵa ıntımdi qyzmet kórsetý úshin jeńil júristi qyzdardan 2 myń teńge kóleminde syıaqy alǵan ákimshisin anyqtady.
Atalǵan jaıt boıynsha QR QK 309-babymen «Jezókshelikpen aınalysýǵa arnalǵan prıtondar uıymdastyrý nemese olardy ustaý jáne jeńgetaılyq» qylmystyq is qozǵalyp, sotqa deıingi tergeý amaldary júrgizilýde.
Aıta keteıik, polıtseıler jyl basynan beri osy tektes 31 qylmys tirkegen. Olardyń ishinde: adam saýdasy, kámeletke tolmaǵandardyń saýdasy, jezókshelikpen aınalysýǵa arnalǵan prıtondar uıymdastyrý qylmystary bar.
