OQO-da jemqorlyqqa qarsy velosherý uıymdastyryldy
ShYMKENT. QazAqparat - Ońtústik Qazaqstan oblysynda jemqorlyqqa qarsy velosherý uıymdastyryldy. Shardara aýdanynda ótken sharaǵa ishki saıasat bólimi men tótenshe jaǵdaılar qyzmetkerleri men belsendi jastar qatysty, dep habarlaıdy QazAqparat HAA tilshisi.
Kúngeıde sońǵy eki aıdan beri ótkizilip kele jatqan «Esikten esikke» baǵdarlamasy aıasynda ótken mańyzdy shara osylaısha shalǵaı aýdanda jalǵasyn tapty. «Parasyz bolashaqqa. Birge!» estafetasyna qatysqan velosıpedshiler aýdandyq tótenshe jaǵdaılar bóliminiń ǵımaratynan bastap, qalanyń ortalyq kóshelerimen júrip ótti. Ortalyq bazar mańynda az-kem aıaldap, turǵyndarǵa sybaılas jemqorlyqqa qarsy úndegen paraqshalar taratty. Árbir velosıpedke mingen jas azamat sybaılastyq oryn alǵan jaǵdaıda habarlasatyn «1424» nomerin keýdelerine taǵyp alyp, nasıhattaý sharalaryn júrgizdi.
«Іs-sharanyń basty maqsaty - halyq arasynda sybaılas jemqorlyqtyń aldyn alýdy túsindirý, onyń kez-kelgen túrine «múldem tózbeýshilik» ahýalyn qalyptastyrý arqyly jemqorlyqqa búkil qoǵamdy tartý bolyp tabylady. Jyl sońyna deıin jalǵasatyn aktsııada qala men barlyq eldi mekenderde sybaılastyqtyń aldyn alý men ony boldyrmaý joldary turǵyndarǵa egjeı-tegjeıli túsindirilip, jemqorlyqqa qarsy nasıhat júrgiziledi. Osynaý is-sharalar Qazaqstanda sybaılas jemqorlyqtyń deńgeıin tómendetýge septigin tıgizetini sózsiz», - dedi aýdandyq ishki saıasat bóliminiń basshysy Baýyrjan Shompıev.
Velosherýge qatysýshylar legi ortalyq stadıonda sherýdi aıaqtap, olardy memlekettik qyzmetkerler saltanatty jaǵdaıda qarsy aldy. Aktsııa sońy ortalyq stadıondaǵy sporttyq jarystarǵa ulasty.
