OQO-da jataqhana salýdyń jańa tujyrymdamasy ázirlenýde

ShYMKENT. QazAqparat - Ońtústik Qazaqstan oblysynda mamandar  memlekettik - jekeshelik áriptestik aıasynda stýdentter úıin salý boıynsha arnaıy tujyrymdama daıyndaýda. Bul týraly Ońtústik Qazaqstan oblysyndaǵy joǵary jáne orta arnaýly oqý oryndarynyń basshylary bas qosqan jıynda «Qazaqstandyq memlekettik - jekeshelik áriptestik ortalyǵy» AQ basqarma tóraǵasynyń orynbasary Talǵat Mataev málim etti, dep habarlaıdy  QazAqparat tilshisi.

«Prezıdenttiń bes áleýmettik bastamasy» atty úndeýinde 2022 jylǵa deıin 75 myń oryndyq jataqhana salý aıtylǵan. Osy tapsyrmaǵa sáıkes, búginde ońtústik óńirinde de aýqymdy jobalar júzege asyrylmaqshy. Qazaqstandyq memlekettik - jekeshelik áriptestik ortalyǵy» AQ basqarma tóraǵasynyń orynbasary Talǵat Mataevtyń sózinshe,  óńirde  jataqhana salý boıynsha tujyrymdama ázirge  naqty bekitilmegen. Áli de ózgertýler men tolyqtyrýlar bolady. Qazir óńirdegi 90 kolledj ben 12 ýnıversıtette bilim alatyn jastardyń 5/3-i jataqhanaǵa muqtaj.

«Elbasy aıtqandaı, stýdent sapaly bilim alý úshin, oǵan tıisti deńgeıde jaǵdaı jasaý kerek. Osyny eskere otyryp, stýdentter úıiniń jobasyn, onyń oryndalý barysyn qaǵazǵa túsirip shyqtyq. Osyǵan baılanysty qandaı da bir usynystaryńyz bolsa, marhabat», - dedi Talǵat Mataev.

Mamandar memlekettik - jekeshelik áriptestik tetigi aıasynda salynatyn stýdentter úıi halyqaralyq standarttarǵa jaýap beretin jataqhana bolatynyn aıtady. Ondaǵy jaılylyq úıdegiden kem bolmaıdy.

Jobamen tanysyp shyqqan joǵary oqý oryndarynyń basshylary birqatar usynys- pikirlerin ortaǵa saldy. Olar sońǵy úlgide salynatyn jataqhanalarǵa tólenetin aqsha máselesine alańdaýshylyq bildirdi. Sebebi, halyqtyń qaltasyna qonymdy bolmasa, stýdentter óz erikterimen páter jaldap turýǵa májbúr bolady. Eger joba tıimsiz bolatyn bolsa, kásipkerler bul máselege qalaı atsalysady dep saýal qoıǵandary da boldy. Joǵary oqý orny jataqhana salatyn bolsa, onda memleket belgili bir ýaqyttyń ishinde oǵan jumsalǵan qarajatty qaıtaryp beredi. Atalǵan qarajat respýblıkalyq bıýdjetten qarastyrylatyn bolady. Al, stýdentterge jataqhana salý isin jergilikti ákimdikter, joǵary oqý oryndary, jeke kompanııalar  birlesip sheshedi. Bul jobany aldaǵy ýaqytta  Úkimet daıyndaıtyn bolady.

Aıta keteıik, Ońtústik Qazaqstan oblysynda memlekettik-jekeshelik áriptestik tetigi arqyly jalpy 59 jobany iske asyrý josparlanǵan. Onyń ishinde, quny 12,3 mlrd teńgeni quraıtyn 22 jobaǵa jeke áriptes anyqtalyp, kelisimshart jasaldy jáne 28,5 mlrd teńgege memlekettik mindetteme alyndy.

Budan bólek, 28,6 mlrd  teńgege 22, onyń ishinde 5 avtomobıl jolyn kúrdeli jóndeý, 5 bilim, 3 densaýlyq saqtaý, 4 sport, 1 jaryqtandyrý, 1 áleýmettik qorǵaý, 3 qurylys jobalaryna jekeshe áriptesti aıqyndaý úshin konkýrs jarııalandy.