OQO-da «Jastar korpýsyn damytý» ilki jobasy tanystyryldy

ShYMKENT. QazAqparat - Ońtústik Qazaqstan oblysynda Bilim jáne ǵylym mınıstrligi men Halyqaralyq qaıta qurý jáne damý bankiniń qoldaýymen iske asyrylyp otyrǵan «Jastar korpýsyn damytý» jobasynyń júzege asyrylý barysy túsindirildi. 

Bul týraly búgin Óńirlik kommýnıkatsııalar qyzmetinde oblys ákiminiń orynbasary Ulasbek Sádibekov, Úılestirý agenttiginiń basshysy Vera Kım men osy agenttiktiń resmı ókili Maksım Rojın baıandady, dep habarlaıdy QazAqparat HAA tilshisi.

Jastar sany boıynsha kósh bastaıtyn Ońtústik Qazaqstan oblysynyń jastary úshin úlken qoldaý ekenin aıtqan oblys ákiminiń orynbasary U.Sádibekov atalǵan joba Qazaqstannyń 4 óńirinde, ıaǵnı, Ońtústik Qazaqstan, Almaty, Pavlodar jáne Qaraǵandy oblystarynyń aýmaqtarynda eki jyldyq pılottyq joba aıasynda júrgiziletinin jetkizdi.

Sonymen qatar, ol oblysta jobanyń úılestirýshisi bolyp «Aýyl jastary Odaǵy» korporatıvtik qorynyń ókili Sabıra Baızaqova bekitilgenin jáne oblystyq «Jastar resýrstyq ortalyǵynan» arnaıy bólme bólinip, qajetti materıaldarmen tolyq jabdyqtalǵanyn atap ótti.

Sondaı-aq, brıfıngte sóz alǵan Úılestirý agenttiginiń basshysy Vera Kım Dúnıejúzilik bank «Jastar korpýsyn damytý» jobasyn qarjylandyrý úshin 20 mln. AQSh dollary kóleminde  grant bóletinin málim etti.

Onyń aıtýynsha, jobanyń maqsaty - jastardy áleýmettendirý, ásirese az qamtylǵan halyq tobyn qoǵamdyq paıdaly isterge jumyldyra otyryp, yntalandyrý.

«Joba Qazaqstanda alǵash ret iske asyrylýda. Elimizdiń jastary úsh-bes adamnan toptasyp, áleýmettik joba ázirlep, ony konkýrstyq komıssııaǵa usyný qajet. Júrgizilgen irikteýdiń qorytyndysy boıynsha jastar bes aılyq kýrstarǵa jiberiledi. Jastarǵa jumysty nemese oqýdy tastaý qajet emes. Keshki altyǵa deıingi segiz saǵattyq jumys kúni bolsa da, olar demalys kúnderi jáne keshki ýaqytta bilim ala alady. Kýrs sońynda áleýmettik jobalardy odan ári damytý úshin granttar beriledi. Eń joǵary grant somasy - 1 mln teńge»,- dedi Vera Kım.

Óz kezeginde Úılestirý agenttiginiń resmı ókili Maksım Rojın atalǵan pılottyq jobaǵa osy jyly 4 oblystan 3 myń adamdy qamtý, al, iske asyrylýdyń úsh jyly ishinde shamamen 8 500 azamattyń qatysatyny josparlanyp otyrǵanyn aıtty. Sondaı-aq ol jobaǵa 18-den 29 jasqa deıingi jastar qatysa alatynyn málim etti.

Aıta keteıik, 2017 jylǵy sáýirden bastap jobaǵa qatysý úshin ótinim usynýǵa, sondaı-aq ótinim usynýdyń sharttarymen jáne rásimderimen tolyǵyraq zhasproject.kz aqparattyq portalynan tanysýǵa bolady. Sonymen qosa, aqparatty [phone] telefony boıynsha nemese [e-mail] elektrondyq poshtasyna jazý arqyly alýǵa bolady.