OQO-da jasóspirimdi zorlaý deregin tergeýdi keshiktirgen qyzmetkerge qatysty qylmystyq is qozǵaldy

ShYMKENT. QazAqparat - Ońtústik Qazaqstan oblysy Báıdibek aýdanynda jasóspirimdi zorlaý deregi boıynsha tergeý sharalaryn keshiktirgen qyzmetkerge qatysty tekserý taǵaıyndaldy. Uzaq ýaqyt tergemegeni úshin oblystyq ІІD Ózindik qaýipsizdik basqarmasy  polıtsııa qyzmetkerine qatysty Qylmystyq kodekstiń 371-shi «Salǵyrttyq» babymen is qozǵady.  Bul týraly búgin oblys prokýrory Ibrahım Imanov baspasóz máslıhatynda málimdedi, dep habarlaıdy QazAqparat HAA tilshisi.  

Óńirdiń prokýrory, sondaı-aq, qyzmetinen ýaqytsha shettetilgen Báıdibek aýdanynyń prokýrory Ábdimútálip Mustafaevtyń ornyna ózge prokýror mindetin atqarýshy bolyp taǵaıyndalǵanyn aıtady.  Onyń sózinshe qyzmettik tekserý sharalary aıaqtalǵan soń ǵana aýdan prokýroryna qatysty naqty sheshim qabyldanatyn bolady. Aıta keteıik, Ábýtálip Mustafaev Báıdibek aýdanynyń prokýrory bolyp ótken 2016 jyldyń  aqpan aıynan bastap qyzmet etip keledi.

«Quqyq qorǵaý qyzmeti» Zańynyń 38-shi babyna sáıkes, qyzmettik tergeý aıaqtalǵanǵa deıin Ábýtálip Mustafaev atqaryp otyrǵan Báıdibek aýdany prokýrory laýazymynan shettetiledi. Qyzmettik tergeý sharalary naqty qaı ýaqytta aıaqtalatynyn aıta almaımyz. Onyń ýaqyty istiń mańyzdylyǵyna, qanshalyqty qıyndyǵyna baılanysty bolady. Al, endi bul aqparat halyqtyń arasyna keńinen taraǵannan keıin erteńgi kúni jaýapsyz qalmaıtynyn bárińiz bilip otyrsyzdar ǵoı», - dedi oblys prokýrory I.Imanov.

Ibrahım Imanov  kúdikti retinde ustalǵan Túlkibas aýdanynyń 1996 jylǵy turǵynynyń ústinen qozǵalǵan qylmystyq is jábirlenýshi jasóspirimniń jaýabynan keıin  Qylmystyq kodekstiń 122-baby 1-bóliginen (On alty jasqa tolmaǵan adammen jynystyq qatynas nemese seksýaldyq sıpattaǵy ózge de áreketter jasaý) 120-shy baptyń 3-bóligi 3-tarmaǵyna (Kórineý kámeletke tolmaǵan adamǵa qatysty zorlyq) aýystyrylǵanyn da atap ótti. 

Eske sala ketsek, Báıdibek aýdanynyń ortalyǵy Shaıan aýylynda  8-shi synyp oqýshysyn zorlady degen kúdikpen 21 jastaǵy jigit qamaýǵa alynǵan bolatyn. Oqýshy qyzdyń týystary polıtseıler tıisti shara qoldanbady dep Bas prokýratýra men Іshki ister mınıstrligine áleýmettik jeli arqyly úndeý jarııalaǵan edi. Al, qylmystyq is qaralyp jatqan Báıdibek aýdanynyń prokýrory Ábýtálip Mustafaev respýblıkalyq «Vremıa» gazetine bergen suhbatynda 14 jastaǵy qyz balanyń jeke ómirine qatysty málimetterdi jarııa etken-di. Osy suhbattan keıin qoǵam belsendisi Murat Ábenov Facebook paraqshasynda "OQO-daǵy prokýrordy zorlanǵan 14 jastaǵy qyz týraly suhbaty úshin jumystan qýý kerektigin" jazǵan. Óz kezeginde QR Bas prokýratýrasy Ońtústik Qazaqstan oblysynda kámelettik jasqa tolmaǵan oqýshy qyzdy zorlaý isin óz baqylaýyna alyp, aýdan prokýrory qyzmetinen shettetilgenin málimdedi.

Al, osy qylmysqa qatysy bar degen kúdikti ýaqytsha tergeý abaqtysyna qamaýǵa alynyp, oǵan qatysty sotqa deıingi tergeý amaldary júrgizilýde. Polıtseıler osy qylmysty ashý úshin birneshe sot-medıtsınalyq saraptamalar taǵaıyndalyp, onyń qorytyndysy boıynsha naqty protsessýaldyq sheshim qabyldanatynyn aıtqan edi.