OQO-da jas ólketanýshylardyń saıysy ótti
ShYMKENT. QazAqparat - Ońtústik Qazaqstan oblystyq bilim basqarmasy «Týǵan jer» baǵdarlamasy aıasynda jas ólketanýshylardyń saıysy ótti. Sý týrızmin damytý maqsatynda uıymdastyrylǵan "Aq jelken" jarysyna 150 oqýshy men 50-ge jýyq maman qatysty, dep habarlaıdy QazAqparat HAA tilshisi.
Elbasy N. Nazarbaevtyń "Rýhanı jańǵyrý: Bolashaqqa baǵdar" maqalasy aıasynda uıymdastyrylǵan saıys Báıdibek aýdany, Arys ózeni boıynda ótti. Onda oqýshylar sýda qaıyqpen júzýden eptilikterin baıqatyp, sheberlikterin shyńdady. Sporttyq, tehnıkalyq jáne taktıkalyq jaǵynan myqtylyqtaryn baıqatty. Saıysqa qatysqan oqýshylardyń biri Kórkemjan Qonysbaı sporttyń sýda júzý túrine qyzyǵatyn balǵyndar sanynyń kóptigin aıtady.
«Men Shymkentten keldim. Sý sportyna qatty qyzyǵamyn. Biz munda tek jarysyp qana qoıǵan joqpyz, qutqarý tásilderin úırendik, eptilikterimizdi tanyttyq»,-deıdi Kórkemjan Qonysbaı.
Jalpy, jıynǵa qatysýshy balǵyndar munda tek jarysyp qana qoımaı, tórt kún boıy dalaly jaǵdaıda ómir súrýdiń de qyr - syrlarymen qanyqty. Sýdan qutqarý men odan ózge de sporttyq- tehnıkalyq sheberlikterin shyńdady.«Jalpy, jıyn óz maqsatyna jetti dep oılaımyn. ıAǵnı, oqýshylarǵa jalpy sý sporty jaıynda jáne dala týrızmi jaıly maǵlumat berip, sony is júzinde kórsetip, tanystyrdyq. Sóıtip balǵyndardy qyzyqtyra alǵandaımyz.
Al sodan keıin sý sportyn tańdaý da olardyń óz erikterinde»,- deıdi Oblystyq jas týrıster stantsııasy MKQK dırektory Sáýle Ómirbaeva.
Jarystan keıin jas týrıster Báıdibek aýdanynyń ortalyǵy Shaıan aýylyn aralap, ondaǵy 150 orynǵa laıyqtalǵan orta mektebinde boldy. Júzimdik aýylyndaǵy mektepten ashylǵan jańa sport zaly men tennıs kordyn, oıyn alańshalaryn kórip shyqty. 
