OQO-da jas qolóner sheberleriniń baıqaýy ótti
ShYMKENT. QazAqparat - Ońtústik Qazaqstan oblysynda jas sheberlerdiń «Altyn qazyna» sándik-qoldanbaly qolóner baıqaýy ótti. Óńirdegi kolledj stýdentteri oblystyq bilim basqarmasy uıymdastyrǵan saıysta óz ónerlerin pash etti, dep habarlaıdy QazAqparat tilshisi.
Baıqaýda jas sheberler jeti baǵyt boıynsha baq synady. Toqyma toqý, metall óńdeý, saz ıleý, aǵash, teri jáne shynydan buıymdar jasaýdan kil myqtylar jınaldy. Sebebi, árbir kolledjde qolóner buıymdaryn jasaýǵa baýlıtyn úıirmeler ashylǵan. Búginde bilim alýshylardyń 25 paıyzy - osyndaı úıirmelerge qatysady. Bilim salasy qyzmetkerleriniń atap ótýinshe, endigi meje - osy kórsetkishti 50 paıyzǵa jetkizip, umyt bolyp bara jatqan qolóner buıymdaryn jańǵyrtý.
«Baıqaýdyń negizgi maqsaty - oqýshylardyń shyǵarmashylyq talanttaryn shyńdaý. Sonymen qatar, ulttyq qundylyqtardy dáripteý. Búgingi kúnde oblysta 95 kolledj bolsa, sonyń ishinde memlekettik 43 kolledj bar. Bilim basqarmasyna qarasty 36 kolledjdiń 25-i búgingi baıqaýǵa qatysýda», - deıdi oblystyq bilim basqarmasynyń bas mamany Laýra Júnisova.
Baıqaý qorytyndysy boıynsha eń úzdik buıymdar iriktelip, eń myqty sheberler anyqtaldy. Júldegerler bilim basqarmasynyń alǵys hattaryna jáne baǵaly syılyqtaryna ıe boldy.
