OQO-da jas kásipkerler klýby quryldy
ShYMKENT. QazAqparat - Shymkent qalasyndaǵy «Rixos Khadisha» qonaqúıinde jas kásipkerler klýbynyń alǵashqy otyrysy ótti. Óńirdegi otyzǵa jýyq jas bıznesmenderdiń qatysýymen ótken basqosýda kásipkerliktiń damýy týraly pikir almasyp, kreatıvti ıdeıalar men usynystar aıtyldy, dep habarlaıdy QazAqparat HAA tilshisi.
Máselen, qatysýshynyń biri memlekettik mekemeler ózderine qajetti zatty tender arqyly alatyn kezde jergilikti jerde shyǵyp jatqan ónimderge basymdyq berýin jáne sol ónimderdiń túr-túsi sıpattalǵan reestr jasaqtalsa degen usynysyn aıtsa, endi biri Memleket basshysynyń argoónerkásip salasynda shaǵyn fermerlerdi bir kooperatıvke biriktirý tapsyrmasy bizder úshin zor múmkindik ekenin alǵa tartty. Osy kooperatıvke birigý arqyly kásibin damytý úshin tómengi paıyzben nesıe alýǵa qol jetkizip otyrǵandaryn jetkizdi. Jas bıznesmendermen bolǵan kezdesýge oblys ákimi Janseıit Túımebaev ta qatysyp, klýbtyń ashylýy músheleriniń bıznes-bastamalaryn iske asyrýdaǵy múmkindikterin keńeıte túsetinin atap ótti.
«Oblys ekonomıkasyn damytý - barshamyzdyń jumyla kóteretin júgimiz. Ol úshin árbir azamat mundaı jumystardy shaǵyn isterden bastaýy qajet. Máselen, úı aldyndaǵy baqshańyzdy kórkeıtip, damytýǵa bolady. Qýantarlyǵy sol, óńirimizde shaǵyn jáne orta bıznes damyp keledi. Endigi qadam, osynaý kásip ıeleri birigip, jumys istemeı turǵan eski zaýyttardy qalpyna keltirip, sol jerde bıznesti odan ary qaraı damytý bolmaq. Sonymen qatar, Qazaqstandy damyǵan 30 eldiń qataryna engizý, turǵyndardyń ál-aýqaty men turmys jaǵdaıyn soǵan saı kóterý Sizder sekildi jastardyń qolynda. Elbasy shaǵyn jáne orta kásiptiń damýyna kóptegen múmkindikter men jaǵdaılar jasap otyr. Sony durys paıdalana bilińizder», - dedi ákim.
Sonymen qatar, ákim aldaǵy ýaqytta jas kásipkerlerdi shet elderge tájirıbe almasý maqsatynda is-saparmen jiberý qajettigin de aıtty. Al, oblystyq Kásipkerler palatasynyń dırektory Asqar Ábýbákirov klýbtyń erkin taqyrypta bıznes-dıalog ornatyp, tıimdi jaǵdaılar jasaý maqsatynda qurylǵanyn tilge tıek etti. 
«Búginde jas kásipkerler klýbynyń quramynda 40 jasqa deıingi 30 jas kásipker bar. Kásibin ashamyn degen árbir azamatqa aı saıyn uıymdastyrylatyn klýb otyrysynyń esigi, árdaıym, ashyq»,- dedi Ábýbákirov.
Klýb otyrysyna bıznesteri jemisti damyp, isker atanǵan azamattar da qatysyp, jas áriptesterine ony damytýdaǵy tájirıbelerimen bólisti. Aıta keteıik, búginde ońtústik óńirinde jumys isteıtin shaǵyn jáne orta kásipkerlik sýbektileriniń sany 173 362 bolsa, onyń 14 618-i shaǵyn kásipkerliktegi zańdy tulǵalar bolyp otyr.
