OQO-da jańǵaq sharýashylyǵyn damytý qolǵa alyndy
ASTANA. QazAqparat - Ońtústik Qazaqstan oblysy Saryaǵash aýdany Jemisti eldi mekeninde «Ońtústik Qazaqstanda ónerkásiptik jańǵaq sharýashylyǵynyń bolashaǵy jáne damý joldary» atty halyqaralyq ǵylymı-praktıkalyq konferentsııa ótti.
Jıynǵa elimizden ózge Reseı, Qyrǵyzstan, Tájikstan men Ózbekstannan jańǵaq sharýashylyǵyn zerttep júrgen tájirıbeli ǵalymdar qatysty, dep habarlaıdy OQO ákiminiń baspasóz qyzmeti.
«Ońtústik Qazaqstan oblysy grek jańǵaǵyn jáne mındal ósirý úshin qolaıly oryn bolyp tabylady. 2020 jylǵa deıin jańǵaq jemis daqyldaryn damytý baǵdarlamasyna sáıkes, oblysta jańǵaq jemis baýlarynyń sanyn arttyrý, jumys oryndaryn qurý josparlanýda. Sol kezde óńirimizde jańǵaqty eksporttaý múmkindigi paıda bolady" , - dedi semınardy ashqan oblystyq aýyl sharýashylyǵy basqarmasy basshysynyń orynbasary Asqar Qanybekov. 
Óńirde jańǵaqty daqyldar negizinen turǵyndardyń jeke sharýashylyqtarynda 300 gektar alqapta ósiriledi. Shetel naryǵynda jańǵaqtyń 1 kelisi 10 dollarǵa para-par. ıAǵnı jemistiń bul túrin eksporttaý el dıqandary úshin mol tabys alyp keledi. Aǵymdaǵy jyly óńirde jańǵaq daqylyn 400 gektarǵa otyrǵyzý mejelenip otyr. Jańǵaq baýlary negizinen Qazyǵurt, Tólebı, Saryǵash jáne Túlkibas aýdandarynda egiledi. 
Konferentsııaǵa qatysýshylar aldymen «Saryǵash jer syıy» sharýa qojalyǵyn aralap, jańǵaq kóshetteriniń túrlerimen tanysyp, ony baptaýdyń aıla-tásilderi jaıly qajetti maǵlumattar aldy.
Ǵalymdar álemdegi jer kóleminiń 7% ǵana jańǵaq ósirýge jaramdy ekenin aıtady. Qazaqstan aımaǵynda mundaı jerge tek ońtústik óńiri kiredi. Elimizdegi jańǵaqtyń 85% Almaty, Jambyl, Ońtústik Qazaqstan oblystarynda ósiriledi. Soǵan baılanysty Qazaqstan grek jańǵaǵyn óndiristik ósirýge jáne eksportqa shyǵarýǵa baǵyt aldy, aldańy 2-3 jylda elimizde jańǵaq baýlarynyń kólemin 5 myń gektarǵa jetkizý josparlanýda.
Kórshiles memleketter arasynda jańǵaq sharýashylyǵy Reseı, Ózbekstan, Qyrǵyzstan men Tájikstanda jaqsy damyǵan. Konferentsııaǵa kelgen atalǵan elderdiń ǵalymdary jańǵaq ósirýdiń qupııalary men tehnologııalaryn túsindirip, tájirbıelerimen bólisti. Sheteldik ǵalymdardyń aıtýynsha, Qazaqstanda jańǵaq sharýashylyǵyn damytýǵa mol múmkindik bar. Tek onyń tıimdiligin sharýalarǵa keńinen nasıhattaý qajet.
