OQO-da janarmaı beketin tonap ketkender jeti aıdan keıin qolǵa tústi
ShYMKENT. QazAqparat - Ońtústik Qazaqstan oblysynda operatordy qorqytyp, janarmaı beketin tonap ketkender jeti aıdan keıin qolǵa tústi. Qylmystyq oqıǵa Saryaǵash aýdanynda bolǵan edi, dep habarlaıdy QazAqparat tilshisi.
Osy jyldyń sáýir aıynda Saryaǵash aýdandyq ishki ister basqarmasynyń kezekshi bólimine janarmaı beketin tonalǵandyǵy týraly habar jetken. Oqıǵa ornyna barǵan tártip saqshylary belgisiz bireýlerdiń medıtsınalyq maska kıip, stantsııanyń operator otyratyn jerine basa kóktep kirgenin anyqtaǵan.
Qaraqshylar beket qyzmetkerlerin óltiremiz dep qorqytyp, kassadaǵy 200 myń teńgeni qoldy etipti. Saryaǵashtyq iz kesýshiler osy qylmystyq oqıǵaǵa qatysy bar degen úsh kúdiktini qolǵa túsirdi. 21 jáne 24 jastaǵy seziktilerdi ustaý barysynda olardan sýyq qarýdyń oq-dárileri tabyldy.
Qazirgi tańda tonaý qylmysyna qatysqan tórtinshi kúdiktige izdeý jarııalandy. Al, ustalǵandardyń ústinen Qylmystyq kodekstiń 191 baby «Tonaý» jáne 287 baby «Qarýdy, oq-dárilerdi, jarylǵysh zattardy jáne jarylys qurylǵylaryn zańsyz ıemdený, berý, ótkizý, saqtaý, tasymaldaý nemese alyp júrý» áreketteri boıynsha is qozǵalyp, tergeý amaldary júrgizilýde.
Kúdiktilerdiń barlyǵy ýaqytsha tergeý abaqtysyna qamalyp, olardyń ózge de qylmystarǵa qatystylyǵy anyqtalyp jatyr.
