OQO-da jańadan «Ońtústik ónimderi» atty aqparattyq jınaq jaryqqa shyqty

ShYMKENT. QazAqparat -  Ońtústik Qazaqstan oblysynda Kásipkerlik palatasy «Ońtústik ónimderi» atty  jańa aqparattyq jınaqty shyǵardy. Ondaǵy maǵlumattar óńirdiń taýar óndiretin kásipkerlerimen tanysyp, óz bıznesin ashqysy keletinderge jańa seriktes tabýǵa yqpal etedi, - dep habarlaıdy QazAqparat HAA tilshisi.

Kásipkerler palatasy osymen ekinshi otandyq taýaróndirýshi kompanııalardyń tizimi engen katalogty shyǵaryp otyr. Birinshi katalogta 250 kompanııa týraly aqparat berilgen bolsa, jańa aqparattyq katalogqa oblystaǵy tamaq, farmatsevtıka, mashına jasaý, hımııa, qurylys salalarymen aınalysatyn 500 kompanııa engen. Munda óńirdegi kompanııalardyń salalyq baǵyty, ornalasqan meken-jaıy men baılanys telefondary jáne t.b. aqparattar berilip otyr.

Mamandardyń pikirinshe  aqparattyq katalog qarapaıym azamattan bilikti kásipkerge deıin qajet bolary sózsiz.
 

 «Óńirlik kásipkerlerdi aqparattyq qoldaý kórsetý de óte mańyzdy. Atalmysh kitapshany basyp shyǵarý arqyly biz jergilikti kásipkerlerge qoldaý kórsetkimiz keldi.  «Ońtústik ónimderi»  aqparattyq kitapshasyn shyǵarý ýaqyt suranysyna saı týǵan dúnıe. Bul katalogtan kez kelgen azamat rastalǵan aqparat arqyly otandyq taýaróndirýshilermen tanysa alady» - dedi oblystyq Kásipkerler palatasynyń dırektory Asqar Ábýbákirov.

Katalogtyń elektrondy nusqasyn «INFOMOB» mobıldi qosymshasynan tabýǵa bolady.

Jalpy, óńirdiń Kásipkerler palatasy jergilikti taýar óndirýshilerge memlekettik satylymdy júrgizý kezinde qoldaý kórsetý, olardyń otandyq naryqta óz ornyn qalyptastyrý jolynda  birqatar jumystar atqarýda.