OQO-da jańadan qurylǵan Keles aýdanynda 135 myńnan asa halyq turady
ShYMKENT. QazAqparat - Ońtústik Qazaqstan oblysynyń ákimi Janseıit Túımebaev Elbasy Jarlyǵyna oraı óńirde jańa aýdandardyń qurylýyna baılanysty Saryaǵash aýdanyna bardy. Jańadan qurylǵan Keles aýdanynyń ortalyǵynda ótken saltanatty sharaǵa óńirdiń depýtattary men «Nur Otan» partııasy oblystyq fılıaly tóraǵasynyń birinshi orynbasary jáne qoǵam qaıratkerleri men zııaly qaýym ókilderi, jergilikti turǵyndar qatysty, dep habarlaıdy QazAqparat tilshisi.
Tarıhı jıynda alǵashqy bolyp sóz alǵan aımaq basshysy aýdannyń bólinýdegi mańyzyna toqtalyp, jergilikti jurtqa quttyqtaýyn jetkizdi.
«Elbasymyz Nursultan Ábishuly Nazarbaev halyq tilegin oryndap, elimizdegi eń úlken aýdandy ekige bólip berdi. Kezinde Keles aýdanynyń dańqy maqta óndirý salasyndaǵy jetistikterimen búkil keńester odaǵyna dúrildep tanyldy. Osy salada bul óńirden kóptegen Sotsıalıstik Eńbek Erleri shyqty. Bul aýdan Ózbekstannyń 5 aýdanymen shekaralasady. Halqynyń sany 350 myńnan asty, ıaǵnı keıbir soltústik oblystardyń halqynyń sanyna shamalap qaldy. Elbasymyzdyń úlken strategııalyq mańyzy bar sheshimimen qaıta qalpyna keltirilip jatqan Keles dep atalatyn aýdan barlyǵymyzǵa qutty bolsyn», - dedi oblys ákimi.
Sondaı-aq, saltanatty sharada óńir basshysy aýdan úshin ter tógip, eńbek etken azamattardy «Oblysqa sińirgen eńbegi úshin» medalimen, Oblys ákiminiń gramotasymen jáne alǵys hatymen marapattady.
Aıtýly tarıhı kúnde otandyq estrada juldyzdarynyń kontserti uıymdastyryp, jergilikti jurtqa merekelik tartý jasaldy.
Aıta ketetini, endi jańa qurylym boıynsha Saryaǵash aýdanynyń aýmaǵy aýmaǵy - 417074 gektardy, halqynynyń sany - 191 096-i quraıdy. Quramynda 14 aýyldyq okrýg pen 71 eldi meken bolmaq. Ortalyǵy - Saryaǵash qalasy bolyp qala bermek. Al Keles aýdanynyń aýmaǵy 345 127 gektardy qurasa, halqynyń sany - 135 819. Aýdanda 12 aýyldyq okrýg pen 83 eldi meken qaramaǵynda bolady. Ortalyǵy - Abaı aýyly dep bekitilip otyr.
