OQO-da jańa formattaǵy jumyspen qamtý ortalyǵy ashyldy
ShYMKENT. QazAqparat - Búgin Shymkent qalasynda Astananyń 20 jyldyǵyna oraı jańa formattaǵy jumyspen qamtý ortalyǵy ashyldy. Qala turǵyndary úshin paıdalanýǵa berilgen ortalyq Memleket basshysynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Joldaýy sheńberinde júzege asyp otyr, dep habarlaıdy QazAqparat tilshisi.
Ortalyqtyń jumysymen tanysýǵa barǵan oblys ákimi Janseıit Túımebaev azamattarǵa tsıfrlyq formatta kórsetilip jatqan qyzmet túrlerine qanyq boldy. Ondaǵy qala turǵyndarymen tildesken aımaq basshysy Janseıit Qanseıituly atalǵan baǵyttaǵy jumystardy taǵy da jandandyryp, xalyqtyń kóńilinen shyǵatyndaı etip qyzmet kórsetýdi tapsyrdy.
Aıta keteıik, jańadan ashylǵan nysanda Jumyspen qamtý jáne áleýmettik qyzmet túrleri salasynda «bir tereze qaǵıdasy» boıynsha qyzmet kórsetý úshin birneshe mekeme toptastyrylǵan. Atap aıtqanda, Halyqty jumyspen qamtý ortalyǵy, Shymkent qalasynyń jumyspen qamtý jáne áleýmettik baǵdarlamalar bólimi men kásipkerlik bólimi, sondaı-aq Azamattarǵa arnalǵan úkimet Memlekettik korporatsııasy OQO boıynsha fılıaly jumys isteýde. Budan bólek, ortalyqtyń taǵy bir ereksheligi - «Nátıjeli jumyspen qamtýdy jáne jappaı kásipkerlikti damytýdyń 2017-2021 jyldarǵa arnalǵan baǵdarlamasy» sheńberinde Shymkent qalasynyń jumyssyz jáne az qamtamasyz etilgen otbasylar, jazasyn ótegen adamdar men eńbekke qabileti tómen múmkindigi shekteýli jandardy turaqty jumyspen qamtý maqsatynda áleýmettik qoldaýǵa baǵyttalǵan. Búginde Halyqty jumyspen qamtý ortalyǵy tolyǵymen tsıfrlyq formatta jumys isteýde. Atap aıtqanda, Elektrondy anyqtama, Óz-ózine qyzmet kórsetý aımaǵy, Call center jáne Tsıfrly kabınet qyzmetteri bar.
Qazirgi tańda 2018 jyldyń jyldyq josparyna sáıkes qala halqynyń 3 myńnan astam azamaty turaqty jumyspen qamtylsa, 1154 jas túlek jastar praktıkasyna joldama alǵan. Qoǵamdyq jumyspen 900-ge jýyq azamat qamtamasyz etilip otyr.
