OQO-da jan túrshigerlik jol apaty bolyp, 5 adam qaza tapty
ShYMKENT. QazAqparat - Ońtústik Qazaqstan oblysynda iri jol apaty bolyp, 5 adam qaza tapty. Taǵy bes jolaýshy aýyr halde aýrýhanaǵa túsken, dep habarlaıdy QazAqparat HAA tilshisi.
Keleńsiz oqıǵa túngi tórtter shamasynda Shymkent-Samara tas jolynyń Ordabasy aýdany mańynda bolǵan. Júıtkip kele jatqan «Lada» jáne «Mersedes-220» kólikteri betpe-bet soqtyǵysyp, saldarynan 22 jáne 27 jastaǵy eki júrgizýshi oqıǵa ornynda jan tásilim etken. Olar Báıdibek jáne Ordabasy aýdandarynyń turǵyndary ekeni belgili boldy. Sondaı-aq «Lada» kóliginiń 27 jáne 28 jastaǵy eki jolaýshysy oqıǵa ornynda, taǵy 45 jastaǵy jolaýshy aýrýhanaǵa bara jatqan jolda jan tapsyrǵan.
Al, «Mersedes» kóliginiń 1995, 1997 jáne 1998 jyly týǵan 5 jolaýshysy túrli dene jaraqattaryn alyp, Ordabasy aýdandyq aýrýhanasyna tústi.
Qaıǵyly oqıǵa boıynsha qazir óńirdiń tártip saqshylary Qylmystyq kodekstiń 345-shi «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzý» babymen is qozǵalyp, anyqtaý sharalaryn júrgizýde. Birneshe sot-medıtsınalyq saraptamalar taǵaıyndalyp, sotqa deıingi tergeý amaldary qolǵa alyndy.
