OQO-da zańsyz kóshi-qon máselesi ózge óńirlermen salystyrǵanda kúrdelirek
ShYMKENT. QazAqparat - Ońtústik Qazaqstan oblysynda zańsyz kóshi-qon máselesi ózge óńirlermen salystyrǵanda kúrdelirek. Oǵan negizgi sebep - óńirdiń ornalasý ereksheligi. Bul týraly oblystyq Іshki ister departamentiniń Kóshi-qon polıtsııasy basqarmasynyń bastyǵy, polıtsııa polkovnıgi Nurdáýlet Tólegenuly málimdedi.
Onyń sózinshe, kórshiles Ózbekstan, Tájikstan men Qyrǵyz elderindegi ekonomıkalyq toqyraý da qosymsha qıyndyq týǵyzyp otyr eken, dep habarlaıdy QazAqparat HAA tilshisi.
Ekonomıkasy kósh sońynda qalyp qoıǵan kórshiles elderdiń azamattary otbasylaryna nápaqa tabý úshin shet elderden jumys izdeýge májbúr. Olar Reseı, Eýropa elderine ońtústik arqyly ótedi. Birqatary kúngeıde turaqtap qalady.
Basqarma bastyǵynyń aıtýynsha, óńirde ýaqytsha tirkeýge turatyn sheteldikterdiń basym kópshiligin qazir Ózbekstan azamattary quraıdy. Jedel-aldyn alý sharalarynyń jáne kúndelikti atqarylǵan jumys nátıjesinde sońǵy 3 aı ishinde kóshi-qon zańdylyǵyn buzǵan 1569 sheteldik anyqtalyp, ákimshilik jaýapqa tartylǵan. Jergilikti 1419 turǵynǵa qatysty da ákimshilik shara qoldanylǵan.
«Oblysta sheteldik jumys kúshin zańsyz paıdalanǵan 39 azamat jaýapqa tartyldy. Tirkelgen meken-jaıdan ózge aýmaqta turatyn jeke tulǵalar men sheteldikterdi óz menshigindegi turǵyn úıge tirkegen - 12, sheteldikterdi zańsyz turǵyn úımen qamtamasyz etken 148 azamat ákimshilik aıyppul tólegen»,- dedi Nurdáýlet Tólegenuly.
Budan bólek, qoǵamdyq oryndarda qaıyrshylyqpen aınalysyp júrgen 4 sheteldik azamat el aýmaǵynan shyǵarylǵan.
