OQO-da zańsyz dárilik shóp jınap júrgen 9 aýǵandyq ustaldy
ShYMKENT. QazAqparat - Ońtústik Qazaqstan oblysynda zańsyz dárilik shóp jınap júrgen taǵy 9 aýǵan azamaty ustaldy. Bul týraly Oblystyq ІІD-niń baspasóz qyzmeti málimdedi, dep habarlaıdy QazAqparat HAA tilshisi.
Saryaǵash aýdandyq kóshi-qon polıtsııasy men Saryaǵash shekara otrıadynyń qyzmetkerleri shetel azamattaryn jedel izdestirý sharalaryn júrgizý barysynda ustaǵan. Qujattaryn tekserý barysynda olardyń Qazaqstan aýmaǵynda eńbek etýge ruqsaty joq ekenderin anyqtady.
«Kóshi-qon zańdylyǵyn buzǵandar Almaty qalasyndaǵy týrıstik fırmalardyń biriniń shaqyrtýymen kelip, saıahatshylar retinde tirkelipti. Olar memlekettik shekaraǵa jaqyn jerden sasyq qýraı dárilik shóbin terip, sony satý arqyly paıda tappaq bolǵany anyqtaldy. Qazir ustalǵandardyń naqty qansha ósimdik jınap úlgergeni tekserilip jatyr. Zań buzýshy sheteldikter sot sheshimi shyqqanǵa deıin Saryaǵash aýdandyq ІІB-nyń ýaqytsha ustaý abaqtysynda bolady. Olarǵa ákimshilik jaza qoldanylǵan soń, óz elderine qaıtarylady»,- deıdi polıtseıler.
Aıta keteıik, bul aýǵandyqtardyń alǵash ret ustalýy emes. Buǵan deıin shekarashylar Saryaǵash aýdanynyń Bozaryq aýylynda atalǵan dárilik shópterdi terip júrgen 19 sheteldikti ustasa, Sattarov eldi mekeninen 18 shaqyrym jerde Aýǵanstannyń taǵy 32 azamaty qolǵa túsken bolatyn. Barlyǵy ákimshilik jazaǵa tartylyp, óz elderine qaıtaryldy.
