OQO-da « Worldskills Kazakstan - Jyl sheberi 2017» chempıonaty bastaldy

ShYMKENT. QazAqparat - Ońtústik Qazaqstan oblysynda  «Worldskills Kazakstan - Jyl sheberi 2017" chempıonaty bastaldy. Mektep oqýshylaryn kásiptik bilim alýǵa shaqyratyn shara eńbek qoǵamyn qurý men jumysshy mártebesin kóterý maqsatynda uıymdastyrylyp otyr, dep habarlaıdy QazAqparat HAA tilshisi.

Aımaqtyq chempıonatqa 35 kolledjden 79  stýdent qatysty. Olar   9 mamandyq boıynsha ózara synǵa túsip, kásiptik bilim deńgeılerin kórsetti.  Elimizde suranysqa ıe  qurylysshy-montajdaýshylar men dánekerleýshiler,  dızaınerler men aspazdar sııaqty maman ıeleri tájirıbelik daıyndyǵyn, kásiptik biliktiligin baıqatty. Shákirtter sondaı-aq shyǵarmashylyǵy men joǵary eńbek mádenıeti, zamanaýı tehnologııalardy is júzinde qoldana alýy boıynsha synaldy. Sala mamandary jastardy kásiptik bilimge baýlý arqyly bolashaqta tájirıbeli mamandar daıarlaýǵa bolatynyn aıtady. 
 

«Negizgi maqsat - jumysshy mamandyqtarynyń ımmıdjin kóterý. Balalarymyzdy osy jumysshy mamandyqqa alyp kelý. Sebebi, qazirgi eńbek naryǵynda eń talap etiletini ol  kásiptik tehnıkalyq bilimi bar jumysshy mamandyqtary. Balalardyń da kúnnen kúnge qyzyǵýshylyǵy artyp keledi».
 

Úsh kúnge sozylǵan  baıqaýdyń jeńimpazdary  halyqaralyq Worldskills chempıonatyna qatysýǵa joldama alyp, álemniń úzdik tájirıbesin úırenýge qol jetkizedi.

Eske salaıyq, ótken jylǵy chempıonat jeńimpazdary óz mamandyqtaryna sáıkes Túrkııa Ulttyq bilim mınıstrligine qarasty aldyńǵy qatarly joǵary oqý oryndaryna tegin bilim alýǵa joldama alǵan bolatyn.