OQO-da ustalǵan qylmystyq top memleketke 5,5 mıllıon teńge zalal keltirgen
ShYMKENT. QazAqparat - Búgin Ońtústik Qazaqstan oblysynda ustalǵan qylmystyq toptyń alaıaqtyq áreketteri týraly jańa derekter belgili boldy. Óńirdiń Memlekettik kirister departamenti qyzmetkerleriniń málimdeýinshe bes adamnan quralǵan top músheleri jumyspen qamtý baǵdarlamasyna bólingen qarjyny urlaýmen aınalysyp kelipti. Qazirdiń ózinde 5,5 mıllıon teńge memleketke zalal keltirgeni anyqtalǵan, dep habarlaıdy QazAqparat HAA tilshisi.
Memlekettik kirister departamenti ekonomıkalyq tergeý qyzmeti mamandary kúdikti áıel basqarǵan top músheleri alaıaqtyq ispen 2015 jyldan beri aınalysyp kelipti. Olardyń memleketke 5,5 mıllıon teńge kóleminde zalal keltirgeni anyqtalǵan. Top basshysynyń úıi men kóligin tintý kezinde 180 dana plastıkalyq bank kartasy, 2 mıllıonnan astam teńge, jeke kásipkerlerdiń mórleri, 22 azamattyń jeke kýálikteri, olardyń eńbek jáne chek kitapshalary, jyljymaıtyn múliktiń qujattary jáne altyn buıymdar tárkilengen.
«Mekemeler ashylǵan kezde kúdiktiler baryp, aldyn ala kelisken. Sóıtip olarǵa basqasha túsindiredi. Artynsha ol azamattardyń atynan senimhat aldyryp, olardyń atynan bankilik kartochkalar ashqan. Sol memleketten bólingen qarjylardy kartochkalarǵa aýdaryp otyrǵan. Keıinnen aýdarylǵan qarajattyń bárin ózi alyp otyrǵan»,- dedi OQO Memlekettik kirister departamenti ekonomıkalyq tergeý qyzmetiniń aǵa ofıtseri Ǵabıdolla Sadyqov.
Dese de qylmystyq top músheleriniń arasynda memlekettik qyzmetkerler bar-joǵy anyq aıtylmaı otyr. Memlekettik kirister departamentiniń mamandary tergeý júrýine baılanysty seziktilerdiń aty-jónderi men jumys oryndaryn qupııa saqtap otyr. Sondaı-aq, bank kartochkalarynyń ıeleri de anyqtalýda eken.
