OQO-da úshkúndik «Qaýipsiz jol» aktsııasy bastaldy
ShYMKENT. QazAqparat - Ońtústik Qazaqstan oblysynda «Qaýipsiz jol» aktsııasy bastaldy. 19-21 aqpan aralyǵynda polıtseıler jol qozǵalysy erejeleriniń saqtalýyn jiti nazarda ustap, baqylaýdy kúsheıtpek, dep habarlaıdy QazAqparat tilshisi.
Jedel-aldyn alý is-sharasy ótkiziletin kúnderi jol polıtsııasy bólimsheleriniń jeke quramy kúsheıtilgen negizde qyzmet atqaratyn bolady. Jalpy, «Qaýipsiz jol» aktsııasy jol qozǵalysy erejelerin buzýǵa tyıym salý, onyń talaptaryn elemegen júrgizýshilerdi áshkereleý maqsatynda uıymdastyrylyp otyr. Sondaı-aq qaýipsizdik belbeýin paıdalanbaǵan, kólik quralyn basqarý kezinde uıaly telefonmen nemese radıostantsııalarmen sóılesken kólik ıeleri de jazalanady. Budan bólek, shara barysynda avtokólikpen jolaýshylardy jáne júk tasymaldaýdy júzege asyrýda jol qozǵalysy qaýipsizdigin qamtamasyz etýge, jaıaý júrginshiler tarapynan jasalǵan jol qozǵalysy erejelerin buzýdy tyıý men áshkereleýge aıryqsha nazar aýdarylmaqshy. Jol qozǵalysynyń ınspektorlary avtobýs parkteri men avtoturaqtarǵa, basqa da ártúrli mekemelerge arnaıy baryp, júrgizýshiler quramymen túsindirme jumystaryn júrgizemiz dep otyr. Mektep oqýshylary arasynda jáne basqa da oqý mekemelerinde de arnaıy semınarlar ótkizý josparlanǵan.
