OQO-da úsh jup egizderdi ómirge ákelgen anaǵa «Altyn alqa» tapsyryldy
ShYMKENT. QazAqparat - Ońtústik Qazaqstan oblysynda úsh jup egizderdi ómirge ákelgen anaǵa qurmet kórsetildi. Túlkibas aýdanynda turatyn Ulbolsyn Jasymbekovaǵa aýdan ákimi «Altyn alqa» taqty, dep habarlaıdy QazAqparat HAA tilshisi.
Elimizdegi altyn qursaqty analardyń qataryna qosylǵan kelinshektiń bul kúnde segiz perzenti bar. 33 jastaǵy kelinshek egiz alty ul-qyzdan bólek, taǵy eki balany ómirge ákelgen. Sala mamandarynyń sózinshe, bir ananyń úsh jup egizderdi ómirge ákelýi tipti respýblıka kóleminde de sırek kezdesedi eken.
Egizderdiń ata-anasy aýdandyq emhanada dáriger bolyp eńbek etedi. Jas otbasy 2012 jyly «Dıplommen aýylǵa» baǵdarlamasy boıynsha turǵyn úımen qamtylǵan. Altyn qursaqty anany Túlkibas aýdanynyń ákimi Nurbol Turashbekov qabyldap, saltanatty jaǵdaıda syı-sııapat tabystady. Aýdan basshysy «Altyn alqany» ıemdengen Ulbolsyn Jasymbekovany quttyqtaı otyryp, demografııamyzǵa úles qosyp otyrǵany úshin rızashylyǵyn bildirdi.
Jas otbasynyń tuńǵysh qyzdary Arýjan 4-synypta oqysa, egiz qyzdary Qymbat pen Symbat 7 jasqa aıaq basty. Odan keıingi egizderi - Uljan men Ulpan 5 jastan asty. Al, Aqarys atty uldary 3 jasta bolsa, 2015 jyly bul batyrdyń izinen egiz inileri Bekarys pen Janarys esimdi balaqaılar dúnıege kelgen. 
